Bezwaarschrift (carta di obhecion) ambtenaar

Mester entrega e carta di obhecion dentro di trinta (30) dia despues di e dia riba cual a tuma e decision, e acto a tuma lugar of a nenga e peticion. Ta considera cu gobierno a nenga di tuma un decision of di actua, si dentro di e termino stipula y na unda cu no tin un tempo stipula, dentro di un tempo rasonabel, no a tuma un decision of no a actua mientras cu tabata su obligacion. Den e caso ey e termino di trinta (30) dia ta cuminsa core for di e dia cu ta considera cu a nenga e peticion.

No ta declara e obhecion di e empleado publico como no-admisibel, si e obhecion ta haci despues di e termino stipula pa esaki, den caso cu por demostra hues satisfactoriamente cu e empleado publico a haci obhecion dentro di trinta dia cu rasonablemente e por a tuma nota di e nengamento of acto. Si un acto ta den cuadro di ehecucion di un decision, obhecion contra e acto ey no ta admisibel si no a haci obhecion na tempo contra e decision tuma.

Mester entrega e carta di obhecion na Corte di Asunto di empleado publico. Hunto cu e carta di obhecion ta entrega por lo menos un copia di dje como tambe un copia autentico di e decision of di e rechaso por escrito cu ta opone contra dje.

E carta di obhecion mester cumpli cu e siguiente exigencianan:

nomber, adres y firma di esun cu ta entrega e obhecion y den caso cu e tin un representante of un apoderado, esun di dje tambe;
un descripcion cla di e decision, accion of rechaso contra cual ta entrega e carta di obhecion;
argumento riba cual ta basa e obhecion;
un cierto demanda; asina leu cu esaki ta e caso den e accion cu ta haci obhecion contra y ta exigi daño y perhuicio, menciona e suma.

Demandante mester scohe domicilio na Aruba y e carta di obhecion mester ta firma door di dje of door di su representante of apoderado.

Ta traha e carta di obhecion segun un modelo cu ta obtenibel na Griffie di Corte den Prome Instancia.

Procedura di obhecion empleado publico

Si e carta di obhecion ta cumpli cu e exigencianan manera ariba menciona, hues ta pone tur documento of copia autentico relaciona cu e caso, sin ningun gasto, na disponibilidad di tur dos partido, nan representante, apoderado y abogado.

Griffier di Corte den Prome Instancia ta laga e partidonan mas pronto posibel sa e lugar cu hues a scohe y e disponibilidad di documentonan. Cada partido por entrega na hues, un contra memorie a base di e carta di obhecion cu dentro di tres siman despues di e fecha di e comprobante di entregamento di e otro partido.

Hues ta dicidi ki dia, ora y e lugar cu tratamento di e caso lo tuma luga. Tratamento di e caso ta tuma luga durante di un sesion publico. Pa medio di un carta oficial sigura, Griffie di Corte den Prome Instancia ta laga e partidonan sa esaki.

Den calidad di su funcion y pa medio di un carta oficial sigura, hues ta laga yama e personanan cu e ta desea pa tende nan testimonio, tambe e personanan cu un di e partidonan a duna como testigo, pa aparece den corte como testigo of como experto riba e dia, ora, lugar stipula.
E sesion ta publico y hues ta dicidi den sala di corte y ta basa e decision exclusivamente riba locual a bin dilanti durante di tratamento di e caso.

E sentencia di hues por ta encera: decision, accion y nengamento (pa tuma decision of pa actua) door di somete demanda di partidonan na su huicio. Ta duna e sentencia publico y den presencia di griffier di Corte den Prome Instancia. Ora dicta sentencia, hues por cambia e decision cu tin obhecion contra dje, tambe na inconveniencia di esun cu a haci obhecion.