Mester paga un suma di AWG. 25,- pa entrega un caso na Corte den Prome Instancia. Si esun cu a entrega e caso gana su caso, lo haya su placa bek.

Entregamento di un carta di obhecion of apelacion no tin un efecto di suspension, esey kiermen cu e decision contra cual a entrega un carta di obhecion of apelacion ta keda na vigor te ora cu bin un decision definitivo.

Sinembargo den algun caso si, tin posibilidad pa suspende e decision. Na prome lugar LAR ta stipula si por pidi huez pa suspende e decision. Den e caso aki mester entrega e peticion pa suspende e decision na mesun momento cu ta entrega e carta di apelacion na Corte den Prome Instancio. Esaki ta principalmente di interes den caso di urgencia, specialmente si ehecucion directo di e decision tin concecuencia cu lo perhudica e persona.

Na di dos lugar tin posibilidad di suspension si esaki ta regla explicitamente den algun ley. Si e decision cu ta contradeci, ta basa riba un ley asina, anto e ora ey si, entregamento di un carta di obhecion tin un efecto di suspension.

Procedura di apelacion LAR 

Si a cumpli cu e exigencianan di e procedura di un carta di apelacion, Griffier di  Corte den Prome Instancia ta nota riba e carta di apelacion e fecha cu a entrega e carta di apelacion. 

Griffie di Corte den Prome Instancia ta manda un copia pa e instancia di gobierno. Corte den Prome Instancia por participa na partidonan cu dentro di un cierto termino nan por entrega tur informacion, documento y prueba cu nan ta considera cu ta sirbi pa preparacion y tratamento di e caso.

Ta stipula un dia pa e caso tuma lugar durante un sesion publico. Griffier di Corte den Prome Instancia ta manda yama por escrito tanto esun cu a entrega e carta di apelacion como e instancia di gobierno. Tambe por invita otro interesadonan. Si ta necesario lo manda yama tambe testigo of experto. Partidonan y nan apoderado ta haya e oportunidad di hiba palabra. Hues tin e competencia pa haci pregunta na e partidonan of nan apoderado.

Sentencia di hues ta basa exclusivamente riba locual a sali afo, durante tratamento di e caso, riba raportahe di e inspeccion na e sitio y e documentonan cu e por a tuma nota di nan. E sentencia por encera cu ta anula e decision completo of ta anula parti di e decision den cual ta mustra cu cual principio e decision ta en pugna cun’e. Si ta necesario hues mes por tuma decision den e caso.