E caso di apelacion ta cuminsa dentro di trinta (30) dia despues cu a dicta sentencia, den caso cu demandante tabata personalmente presente of pa medio di un representante of apoderado na momento cu a dicta sentencia. Den tur otro caso, caso di apelacion ta cuminsa trinta (30) dia despues cu a manda of a entrega un copia di  sentencia den man di  demandante. Den e caso aki ta menciona fecha di mandamento of di entregamento riba e prueba cu a ricibi'e.

Ta apela e caso door di entrega un carta di apelacion na Corte di Apelacion  den asunto di empleado publico na Griffie di Corte.

E carta di apelacion mester cumpli cu siguiente exigencianan:

• nomber y adres di esun cu ta apela e sentencia y den caso cu e tin un representante of un apoderado, esun di esaki tambe;
• un descripcion cla di e decision cu Corte a tuma y su argumentacion;
• e base riba cual ta apela;
• un cierto demanda; asina leu cu esaki ta e caso den e accion cu ta haci obhecion encontra y ta exigi daño y perhuicio, menciona e suma.

Den e carta di apelacion, demandante mester scohe domicilio na Aruba y e carta di apelacion mester ta firma door di dje of door di su representante of apoderado.

Procedura di apelacion empleado publico

Si e carta di apelacion ta cumpli cu e exigencianan manera ariba menciona, Corte di Apelacion ta pone, na Griffie di Corte na Aruba, tur documento of copia autentico relaciona cu e caso, sin ningun gasto, na disponibilidad di tur dos partido, nan representante, apoderado y abogado. Griffier di Corte ta laga e partidonan mas pronto posibel sa; e luga cu hues a scohe y e disponibilidad di documentonan.

Esnan contra ken ta apela, por entrega na Corte di Apelacion un contra memorie a base di e carta di apelacion. Mester entrega e contra memorie dentro di tres siman despues di e fecha di e comprobante di entregamento door di e otro partido. Corte di Apelacion ta laga e partidonan sa ki dia, ora y na unda e sesion lo tuma luga.

Tambe den caso di apelacion, hues, den calidad di su funcion, ta laga yama pa medio di un carta oficial sigura, e personanan cu e ta desea pa tende nan testimonio como tambe e personanan cu un di e partidonan a duna como testigo pa aparece den corte como testigo of como experto riba e dia, ora y luga.
E sesion di Corte ta publico y Corte di Apelacion ta delibera y ta dicta sentencia den sala di Corte.

E sentencia di Corte di Apelacion ta encera: decision, accion y nengamento (pa tuma decision of pa actua) door di somete e demanda di partidonan na su huicio. E presidente di Corte di Apelacion ta dicta sentencia publico.

Den caso cu e presidente no por ta presente, un di e miembronan cu a trata e caso y cu tin e rango mas halto ta dicta sentencia. Ta haci mencion di esaki den e sentencia. Corte di Apelacion ta ratifica e sentencia, sea cu ta tuma over e decision, sea cu ta drecha e argumentacion of ta anula e decision parcialmente of completamente, loke cu Corte den Prome Instancia mester a haci. Ora di dicta sentencia, por cambia e decision cu tin obhecion contra dje, tambe na inconveniencia di esun cu a haci apelacion.