Aruba como economia chikito ta importa mayoria producto cu nos ta cumpra den supermercado of tienda. Ta trata di productonan pa uzo diario manera cuminda, bebida te material di construccion. E productonan ta yega Aruba via barco y avion di diferente pais y ta destina pa produccion y consumo local of Freezone. Ta categorisa tur producto den seccion manera por ehempel producto alimenticio.

Te cu juni 2023, e balor di producto importa a yega un suma total di Afl. 1.4 biyon. Di e suma aki, Afl. 1.3 biyon ta destina pa produccion y consumo local y Afl. 69 miyon via Freezone pa exportacion. E peso total te cu juni di 2023 a yega un total 345 miyon kilo di cual 340 miyon kilo ta e peso importa pa produccion y consumo local y 5 miyon kilo via Freezone pa exportacion.
 

E data ta mustra cu e balor y peso te cu juni 2023 ta mustra un subida compara cu 2022. Te cu juni di 2023 e balor di importacion total a subi cu 184 miyon florin, y e peso total a subi cu 44 miyon kilo. Te cu juni di 2022 e balor di importacion y peso tawata respectivamente 1.2 biyon florin y 300 miyon kilo. Importacion te cu juni di 2023 ta mustra solamente un subida den balor compara cu importacion te cu juni di 2019. Motibo di esaki ta cu den segundo kwartaal di 2023 e peso di importacion tawata menos cu e segundo kwartaal di 2019. Balor y peso di importacion te cu juni 2019 tawata 1.1 biyon florin y 358 miyon kilo.

Analisis ta mustra cu e balor di importacion te cu juni 2023 a subi cu 25% compara cu e mesun perido di 2019, pero den peso (kilo) pa e mesun periodo importacion, a baha cu 4%. Esaki ta un indicacion cu aunke nos ta importa menos den peso, e balor di importacion ta relativamente mas halto door di e impacto di prijs halto internacional nos ta paga relativamente mas pa nos importacion.

Ministerio di Asunto Economico, Comunicacion y Desaroyo Sostenibel ta monitor continuamente desaroyo di importacion y exportacion di producto y su impacto riba economia di Aruba.

Den e siguiente publicacionnan di CBS por tira un vista riba e cifranan di importacion y exportacion di Aruba pa 2023:

• Importacion y exportacion, dos kwartaal 2023 Foreign Trade Statistics, Month in review June 2023
• Importacion y exportacion, prome kwartaal 2023 Foreign Trade Statistics, Month in review June 2023
• Foreign Trade Statistics, Month in review May 2023
• Foreign Trade Statistics, Month in review April 20230
• Foreign Trade Statistics, Month in review March 2023
• Foreign Trade Statistics, Month in review February 2023
• Foreign Trade Statistics, Month in review January 2023

Pa mas informacion tocante cifranan di importacion y exportacion di Aruba, por bishita e website www.cbs.aw