ATA ta reforsa aliansa cu diferente aerolinea y socio durante ITB Berlin 2025

ATA ta reconoce e retonan di e mercado Europeo, incluyendo competencia intensifica y costo di biahe pa Aruba creciente, y den e contexto cu pa Europa Aruba ta un destino “longhaul”. Alabes, a reuni cu diferente aerolinea pa asina por reforsa e aliansa y actualisacion di producto Aruba.

Na Europa, KLM ta e aerolinea mas importante pa Aruba. For di Alemania tin dies ciudad cu e vuelo ta conecta via Amstedam pa Aruba. E tres ciudadnan di mas importante ta Munich, Berlin, y Frankfurt. KLM a confirma cu e esfuerso di ‘joint-marketing’ na september 2024 ta dunando su resultado. “Forward bookings” tambe ta positivo te cu awo. E aña aki a determina cu lo keda enfoca riba mercadeo pa e tres ciudadnan mas importante. Ademas, lo continua na analisa e potencial pa crece otro ciudadnan importante y afluente, manera Hamburg y Stuttgart.

Un aerolinea importante pa Aruba for di e mercado di Norte America ta Jetblue. Jetblue a inicia vuelonan for di Amsterdam y London pa New York y como tal a bira di interes den e mercado Europeo tambe. ATA y Jetblue a palabra pa desaroya e ruta via New York como un destinacion dual. Na unda e biaheronan por combina un vakantie na New York y Aruba, locual den industria ta ser yama un “Dual Destination Vacation”.

ATA a reuni cu e aerolinea Suiso Edelweiss cu ta forma parti di e grupo di Lufthansa di Alemania. Durante e reunion, Edelweiss a elogia ATA cu e bon trabao pa posiciona Aruba y crece e conscientisacion den e mercado. Esaki a resulta den crecemento di e mercado Suiso den 2024. ATA a confirma cu lo sigui inverti den e mercado y cu lo sigui traha riba opcionan di vuelo non-stop pa asina por cuminsa trece huespednan di Alemania, Suiza, y Italia.

E mercado Europeo ta sumamente importante pa Aruba, y ITB Berlin ta continua na fungi como un plataforma esencial pa fortalece nos relacion cu socionan clave. ATA hunto cu su socionan ta keda comprometi pa sigui desaroya strategianan presenta, conforme e Plan Corporativo 2025.

Cu e bishita na ITB Berlin 2025, Aruba ta sigui demostra su dedicacion pa crea y mantene relacionan duradero y pa sigui inspira segun e lema caluroso di ‘One Happy Island’. Tur esaki teniendo cuenta cu esnan cu ta bishita for di Europa ta keda alrededor di 2 siman riba nos isla, compara cu e huesped for di Norte America cu ta keda menos dia. Ademas e mercado di Hulanda, segun transaccionan di VISA credit card den 2024, ta forma parti di e top 5 di mercadonan caminda e huesped ta gasta mas den averahe, pues ta laga mas atras pa Aruba.