Aruba y Brasil conecta a traves di GOL Airlines for di São Paulo-Guarulhos (GRU)

Representantenan di GOL Airlines Danilo Barizan – Commercial Director y Rafael Araujo – Director of Planning, Wieneke Vullings – Consul General di Reinado Hulandes estableci na Brasil, hunto cu e delegacion di Aruba cu a consisti di Ronella Croes – CEO di A.T.A., Sanju Luidens – CMO di A.T.A., Jordan Schlipken – Director di A.T.A. LATAM, Andrew Hoo – Director di Inmigracion di Aruba, y Carlos Barbosa – A.T.A. Brasil, a forma parti di e celebracion historico aki.

E vuelo inaugural G3 7716 ta simbolisa no solamente comodidad, pero tambe ta fortalece e laso cultural y economico entre Brasil y Aruba. E ruta directo nobo aki ta reduci e tempo di biahe entre Brasil y Aruba pa solamente seis ora y mey, y ta programa cu tres vuelo semanal, bulando cu e Boeing 737-8 MAX cu capacidad pa carga 176 pasahero. Esaki ta haci Aruba e isla Caribense di mas accesibel pa e huesped Brasilero, for di e mercado di São Paulo

Aruba ta un destino Caribense popular pa huespednan Brasilero y cu e vuelo aki, Aruba Tourism Authority (A.T.A.) ta anticipa un crecemento significativo den e mercado specifico di Brasil, reforsando e posicion di Aruba como e destino preferi di huespednan di Brasil.

Aruba ta sigui fortalece su presencia den mercado Latino America, cu un proyeccion pa ricibi alrededor di 182,838 di e mercado aki na final di 2024, representando un resultado adicional di 39% compara cu 2023. Danki na un strategia exitoso di diversificacion, desde 2014 e mercado di Brasil a logra un crecemento positivo promedio anual di 25%, un cifra cu a subi te na 54% den e ultimo tres añanan.

E huesped Brasilero ta conoci pa tin un patronchi di gasto mas halto cu hopi otro mercado. Segun e estudio mas recien di tarheta di credito Visa, Brasileronan ta gasta un promedio di $685 pa dia pa cada persona cu tin un tarheta di credito y ta uza esaki durante di nan biahe na Aruba, poniendo nan como e tercer mercado cu ta gasta mas riba e isla despues di Chile y Estados Unidos. Cu e mercado di Colombia stabilisa, e ruta nobo entre São Paulo, Brasil, y Aruba lo sigui sostene un aumento den ‘market-share’ di Latino America, subiendo e di 8% di e total di huesped na 2014 pa un estimacion di 14% na 2024. Y cu mas di e huespednan aki, Aruba lo sigui atrae mas di e mercado cu patronchi di gasto mas eleva cu otro.

E conexion nobo di Gol Airlines ta parti di un expansion mas grandi den aviacion Latino Americano y pa 2025, lo pone un total di 305,000 asiento disponibel pa vuelo entre Aruba y e region.