Aruba Tourism Authority a presenta e segundo sesion “Eco-Conscious”

Un sesion cu a ser presenta pa Marisol Sanchez – Communications Manager di ATA, y representantenan di agencia internacional Zeno Group cu a cumpli cu un investigacion extensivo hunto cu ATA, esta Stephanie Casanova SVP Consumer Communications, Amelia Brandt - Senior Vice President - Purpose & Impact, y Sherwin Francies - Senior Account Executive – Consumer. A comparti e strategia nobo encuanto e programa “Aruba Promise”, cu ta dirigi riba entre otro nos bishitantenan y ta delinea na nan e ‘Code of Conduct’ desea durante nan bishita.

Na mei 2024, ATA a presenta e prome sesion “Eco-Conscious” na socionan local cual a enfoca riba tendencianan global, manera e movemento di “Slow Travel Tourism”, alabes e movemento di “Positive Impact Tourism” cu ta enfatisa y ta enfoca riba impacta e pais di bishita na un manera positivo. Ta di menciona cu despues di e prome sesion, ATA a continua cu trabounan extenso pa asina cuminsa concretisa diferente plan di accion pa cu programanan nobo y existente.

Cu e di dos sesion, ATA a comparti cambionan pa cu e programa “Aruba Promise”, esta e “Code of Conduct”. Ta pidi bishitantenan pa compromete nan mes y firma e promesa cu ta delinea cu e lo comporta su mes di un manera cu ta yuda Aruba protehe locual ta importante pa nos y mehora nos isla conforme locual nos ta hanja ta importante. Globalmente, por nota mas y mas e tendencia pa atrae e bishitante cu ta mas responsabel y sostenibel pa e destinacion. E bishitante cu ta laga e pais miho cu e la hañe. Pa ATA, esaki ta di sumo importancia! Desaroya Aruba den conformidad cu practicanan sostenibel, ta exigi cu e bishitante tambe mester ta un huesped responsable y respetuoso na e país cu e ta bishita.

Cu e “Aruba Promise” y “Code of Conduct” actualisa, ATA ta enfoca na crea conscientisacion riba e promesa y comportacion, caminda cu ta urgi e bishitante pa primiti nan mes di disfruta di e destinacion segun un comportacion respetuoso y responsabel.

ATA ta implementando un plan di comunicacion mas extenso cu lo inclui e comunidad local, socionan local, e aspecto di educacion, compromiso, y participacion, cu e meta pa hunto como organisacion, comunidad, y socionan local por bay den e direccion mutuo.