Aruba ta yama bon bini na barco crucero "Ilma" di The Ritz-Carlton Yacht Collection

Ilma, e miembro di mas nobo di The Ritz-Carlton Yacht Collection, ta representa un mescla elegante entre sostenibilidad y luho. Como e segundo barco den e coleccion despues di Evrima, lansa den 2022, Ilma ta presenta caracteristicanan innovado cu ta pone turismo crucero luhoso na un nivel mas halto. Su nomber ta deriva di e palabra Maltes “ilma”, cu ta significa “awa”, reforsando su conectividad cu sostenibilidad maritimo.

The Ritz-Carlton Yacht Collection a lansa Ilma na 2024 y tin un largura di 241 meter, ta conta cu 350 miembro di tripulacion, tin capacidad pa acomoda 456 pasahero den 228 suites cu nan propio terasa y ta conta cu varios restaurant gourmet. E routa di Ilma den Cariba ta inicia na Bridgetown, Barbados, y ta crusa Caribe direccion di Boneiro, Corsou y ta yega Aruba mainta y sali e siguiente dia pa 12or di merdia rumbo pa Canouan na Sint Vincent and the Grenadines y ta ta regresa Bridgetown, cumpliendo asina cu su trip di ocho anochi.

Ilma ta inclui tecnologia hybrid cu combustibel LNG, un diseño moderno di luho den tur su suites espacioso, un piscina infinito, un centro di bienestar y un spa amplio. Huespednan por spera un servicio personalisa y renombra di Ritz-Carlton, redefiniendo e arte di biahe luhoso.

E bishita especial aki ta ofrece huespednan di Ilma un anochi na Aruba, proveendo e oportunidad unico pa descubri e cultura vibrante y atraccion di Aruba.

Ronella Croes, CEO di ATA, y Marc Figaroa, CEO di APA, cada un a presenta un plakaat conmemorativo na e capitan di Ilma, Darin Bowland, cu a expresa su gratitud pa e bon bini caluroso ricibi. E intercambio tradicional di plakaat ta un custumber maritimo cu ta honra e prome bishita di un barco crucero na un waf.

E yegada di Ilma ta provee sosten na e estrategia di atrae cruceronan luhoso y eleva experiencia turistico na Aruba den e siguiente manera:

• Atrae huespednan cu ta contribui significativamente na nos economia;
• Promove estadia mas largo den nos waf
• Promove bishita durante low-season, y mehora e distribucion di barconan crucero anualmente y distribui huespednan miho riba nos isla.
• Inverti den capacitacion y entrenamento di nos socionan local den e industria di crucero.
• Ofrece entrenamento di risk-management y desaroyo di producto pa eleva e nivel di servicio y promove mas sostenibilidad y turismo responsabel.

Mientras cu Ilma ta sali pa su siguiente destinacion, Aruba ta mira dilanti na mas cooperacion cu The Ritz-Carlton Yacht Collection y otro lineanan di crucero luhoso. Su bishita ta fortifica Aruba como un destinacion di balor halto den Caribe, caminda luho y sostenibilidad ta bay hunto den harmonia pa crea experiencianan inolvidabel.