Aruba ta ricibi 15.3 miyon Euro for di Union Europeo

European Commission, ta e comision responsabel pa tuma decision riba fondo cu ta aloca pa  paisnan cu ta miembro di e Overseas Countries and Territories Association (OCTA).
Prome Minister Evelyn Wever-Croes, como Presidente nobo di OCTA, a hiba palabra den nomber di e 13 paisnan cu ta pertenece na e asociacion y den un reunion cu e European Commissioner, a expresa e deseo di cada pais miembro. A logra yega na un acuerdo financiero pa e aña benidero di un suma di 15 miyon Euro, cu lo reparti igual den e 13 paisnan, cu ta 1.15 miyon Euro pa cada pais. Den e siguiente dianan Gobierno lo dicidi unda lo inverti e suma aki.

Diahuebs 29 di februari, Minister Geoffrey Wever, como Territorial Autorizing Officer pa Aruba, tabatin e honor pa firma e acuerdo financiero pa e programa di digitalisacion di Gobierno su "Roadmap to e-Government". E proyecto di e-Government tin algun tempo caba den preparacion cu sosten di FUTURA y un team di innovacion, cu mientrastanto a presenta e plan na Union Europeo. Union Europeo a aproba e proyecto y a otorga Gobierno e suma di 14.2 miyon Euro pa por completa e proyecto di e-Government. Lo haci e fondo accesibel den forma di tranches, segun e plan di ehecucion cu ainda Gobierno mester entrega. Unabes completa cierto parti di e proyecto, lo duna e siguiente tranche pa e siguiente proyecto.

E-Government lo facilita e servicio entre departamentonan di Gobierno pero lo haci e servicionan pa publico mas eficiente y facil. Gobierno ta inventarisando cua departamento tin mas necesidad pa digitalisacion y cua servicionan tin prioridad. Unabez e plan ta aproba, lo comunica cu comunidad den forma transparente, con lo inverti e suma di 14.2 miyon Euro. E proyecto di e-Government lo inicia den 2024 y lo tin un duracion di 4 aña.

Gobierno ta contento cu a ricibi e fondonan di Union Europeo pa inverti den mehora substancialmente e servicio na publico.