Aruba ta logra intercambio automatico di informacion financiero

Esaki ta encera cu awo Departamento di Impuesto (DIMP) por intercambia informacion fiscal cu otro paisnan na un manera sigur.

Global Forum pa transparencia y intercambio di informacion pa asuntonan di impuesto, ta e organo internacional principal cu ta traha riba implementacion di e normanan global pa transparencia y intercambio di informacion fiscal rond mundo. E meta principal di e Global Forum ta combati evasion di impuesto y asina promove transparencia fiscal internacional.

Ta logra esaki door di evalua y supervisa implementacion di e normanan internacional pa intercambio di informacion di cuenta financiero segun e Common Reporting Standard cerca paisnan miembro. Aruba a compromete

su mes pa realisa intercambio fiscal segun e Standard pa Intercambio Automatico di Informacion (AEOI Standard) di cuenta financiero den asunto di impuesto desde 2018. Siguiendo e trabou di Aruba pa mehora confidencialidad y siguridad di dato, un team di Global Forum recientemente a evalua y conclui cu Aruba ta cumpli cu e rekisitonan y ta tuma e medidanan necesario pa activa e intercambionan reciproco.

Consecuentemente ta considera Aruba un partner adecua relaciona cu e AEOI Standard, cual ta permiti pa ricibi informacion di e otro paisnan miembro segun e AEOI Standard, cual tambe ta uza pa intercambio segun e normanan di transparencia relaciona cu BEPS (“Action 13 Country by Country Reporting” y “Action 5 Transparency Framework”).

Aruba ta duna hopi balor na siguridad di informacion, pasobra esaki ta brinda confiansa publico y tambe ta proteha e confidencialidad, disponibilidad, y integridad di e sistema financiero di e isla. Aruba ta reconoce e importancia di confidencialidad y proteccion di dato y ta dedica na introduci y mantene e medidanan robusto di siguridad di informacion pa proteha informacion confidencial di e contribuyentenan, cu e meta di ta un partner confiabel den e proceso di intercambio di informacion fiscal cu otro paisnan.