Aruba ta gana premio Tripadvisor Travelers’ Choice 2024

E premio aki ta honra destinacionnan cu ta ricibi evaluacionnan excepcional, y Aruba a bira e miho destinacion den Caribe y e di binti cuater miho destinacion na mundo riba e plataforma di Tripadvisor. Como e plataforma di mas grandi di guia di biahe mundial, Tripadvisor ta basa su premionan riba feedback autentico di huespednan cu a laga evaluacion directo y honesto durante un aña completo. Esaki ta converti e reconocemento di Travelers’ Choice den un seyo di excelencia di confiansa pa destinacionan extraordinario. 

Ronella Croes, CEO di A.T.A. a duna di conoce di ta honra pa e reconocimento aki di companianan prestigioso, tanto regionalmente como mundialmente, y esaki ta stimula nan pa sigui ofrece experiencianan excepcional pa nos huespednan.

Travelers’ Choice ta honra destinacionnan cu ta demostra un compromiso continuo den duna servicio excepcional den hospitalidad. E premio aki ta un simbolo di e impacto memorabel cu Aruba tin riba su huespednan, cu a resulta cu hopi ta esnan cu a tuma e tempo pa laga un evaluacion di nan experiencia na Aruba riba plataforma di Tripadvisor. 

Huespednan ta uza e seyo di Travelers’ Choice como un guia pa descubri e miho lugarnan pa bishita, come, y relaha. E logro grandi aki no ta sin e esfuerso di tur esnan cu ta traha diariamente den e sector turistico na Aruba y duna e servicio excelente na cada huesped cu ta bishita Aruba.