Aruba ta fortifica su Resiliencia Climatico cu aliansa strategico
Oranjestad – Aruba tin poco infrastructura pa enfrenta cambio climatico. Esaki a conclui for di e portfolio di Naturalesa na 2021. Sin data y strategia, no por tin accion efectivo.
Pa esaki a prepara un roadmap cu tres fase principal:
- Identifica riesgo y vulnerabilidad,
- Calcula costo di solucionnan climatico,
- Busca financiamento pa implementacion.
Na 2022, Minister di Transporte, Integridad, Naturalesa y Asunto di Adulto Mayor, Ursell Arends, a asisti na e UN Ocean’s Conference na Lisboa, Portugal, y a sigura un acuerdo cu Stimson Center pa implementa CORVI (Coastal & Ocean Risk Vulnerability Index). Na Aruba, a firma un colaboracion cu IPDC (International Panel on Deltas, Coastal Areas, and Islands) pa fortifica capacidad y acceso na conocemento den Reino Hulandes. Na 2023, Minister Arends a participa den "Our Oceans Conference" y "UN Water Conference" na New York, promoviendo financiamento pa adaptacion climatico. Ademas na 2023, durante diferente reunion cu stakeholder di sector priva y NGO’s, a busca partnership pa traha riba Aruba su resiliencia climatico. Asina a forma partnership cu: Aruba Airport Authority, Aruba Bank, AHATA, ATA, Centrale Bank van Aruba, Meta Corporation, Setar NV, Utilities Aruba NV, WEB Aruba NV, Ministerio di Naturalesa, y NCRC.
Dia 22 di april 2024, Dia di Mama Tera, Aruba a instala e National Climate Resilience Council (NCRC). Durante e evento, a firma dos acuerdo crucial:
- Acuerdo CORVI cu Stimson Center (USA)
- Acuerdo Climate Impact Atlas cu CAS y IPDC (Hulanda)
Durante 2024, e tayer di stakeholder tabata clave den desaroyo di CORVI y Aruba’s Climate Impact Atlas. E encuesta CORVI di october 2024 a duna resultadonan inicial positivo. Ademas esfuersonan ta continua pa ta mas resiliente contra cambio climatico. Dia 30 di januari, mas cu 35 diferente stakeholder a participa na e tayer di "Co-designing Aruba's Climate Impact Atlas" duna door di NCRC y Climate Adaptation Services kende ta un partner sumamente valioso. Den colaboracion cu sector publico, priva y organisacionnan no-gobernamental a demostra cu Aruba ta liderando e esfuersonan pa traha un Strategia di Adaptacion Nacional.
Aruba ta riba e bon caminda pa por compronde riesgo climatico pa asina por bin cu implementacion di solucionnan efectivo. Na final di dia nos mester ta consciente cu Cambio Climatico ta afecta nos tur.