Aruba ta fortalece su presencia durante feria turistico di ANATO 2025

Conoci como e evento di mas importante di e sector cu a tuma lugar na Colombia. A conta cu un agenda strategico y reunionnan importante, caminda cu delegacionnan di Aruba cu un total di 15 compania y alrededor di 35 persona a enfoca na consolida posicionamento den e mercado Latino Americano y continua na fortalece laso cu socionan comercial y di aerolínea.

Desde diamars 25 di februari a cuminsa cu reunionnan interno di A.T.A. pa revisa resultado nan di 2024, strategia di 2025, update di plan nan cu aerolinea Latino Americano den preparacion pa reunionnan importante cu lo tuma lugar durante e siman aki. 

A reuni cu:

• Operador grandi di Latino America, Despegar. 
• Holland House, cual ta e camara di comercio di Reino Hulandes na Colombia pa un contexto politico y di comercio 
• agencia creativo MullenLowe cu ta apoya Aruba posiciona su marca den e region. 
• a cumpli cu diferente entrevista cu ehecutivonan principal a traves di medio di comunicacion internacional manera Ladevi, Forbes, y Réport, compartiendo un actualisacion riba strategia y desaroyo di Aruba pa cu 2025 y e siguiente añanan binidero.

Durante e Feria Turistico riba 26 di februari lansa oficialmente ANATO 2025, cu e presencia di e Presidente di Colombia, Minister di Turismo y entidadnan gubernamental. A inaugura e booth di Aruba den Pabilon 17 cu a inclui cortamento di cinta y entrevista cu medionan local. Marc Hauwert - Deputy Ambassador di Embahada Hulandes, director di Holland House Jan Willem Van Bokhoven, representantenan di A.T.A., AAA, Aruba Convention Bureau (ACB), DMC (Destination Management Company), representante di hotelnan local, operador di tour local tabata presente.

E delegacion ehecutivo di Aruba a cumpli cu reunionnan importante cu aerolineanan manera JetSmart, Avianca, Wingo y Copa Airlines.   Durante e combersacion nan aki, A.T.A. y AAA por a informa nos socionan di e crecemento y relevancia importante cu e region Latino America a logra durante e ultimo añanan. Cu un crecemento promedio anual di e ultimo 10 aña nan di 26% y e aportacion directo na e importancia di e strategia di diversificacion, ampliando de tal manera e participacion di e region cu 10.5% durante 2023 pa un 13% den 2024. 

Tambe a resalta e strategia di diversificacion dentro di e region Latino America, unda A.T.A. conhuntamente cu AAA ta enfocando den posiciona y fortalece e turismo cu ta bini for di mercadonan manera, Argentina, Brasil, Chile y Peru. A elabora riba e strategia di mercadeo cu ta inclui e consolidacion di e campaña "El Efecto Aruba", implementacion di herment digital y personalisacion di experencia pa asina por atrae e segmentonan desea di e mercado.

E participacion den ANATO 2025 ta reafirma e compromiso di Aruba pa cu innovacion y crecemento sostenibel di turismo.