Aruba su seguridad ta score halto den Caribe
ORANJESTAD - Recientemente, e media di noticia Britanico "The Telegraph" a publica un analisis di e problema di crimen violento den Caribe y su impacto potencial riba turismo.
Den e articulo Aruba a resulta e isla cu tin e ‘safety score’ di mas halto den Caribe.
Varios isla den Caribe ta sufri di un aumento significante den crimen violento, incluyendo homicidio, atraco, y maltrato. Trinidad y Tobago recientemente a declara un estado di emergencia den un intento pa combati e ola di violencia, un paso cu ta refleha e gravedad di e situacion na e pais. E crecemento di crimen ta aumenta e precupacion no solamente riba siguridad local, sino tambe riba su potencial pa descurasha turismo, un sector vital pa economia di hopi isla den e region.
No tur isla den Caribe ta enfrenta e mes nivel di crimen.
Aruba hunto cu Bermuda, ta na prome y segundo luga como e islanan mas sigur den Caribe cu 90 punto, sigui pa British Virgin Islands cu ta score 89 punto. Barbados, Boneiro, Corsou, Dominica y Grenada ta sigui cu 80 punto pa nan seguridad.
Mientras cu algun isla den Caribe ta enfrenta reto serio cu crimen, tin destinacionnan, manera Aruba, cu ta sigui mantene un ambiente sigur y atractivo pa turista.
Pa turistanan cu ta pensa pa bishita e islanan den Caribe, e articulo ta recomenda pa investiga e situacion di siguridad di un destinacion prome cu dicidi pa biaha pa un destinacion den Caribe.