Aruba presente na "Creative Commons" na Portugal
ORANJESTAD - Como parti di e programa di TAROC (Towards a Recommendation for Open Culture), ‘Creative Commons’ a organisa dos dia di session pa elabora riba e topico aki na Lisboa, Portugal.
Na e sesionnan aki a participa 50 experto riba varios tereno manera ley, maneho, digitalisacion, representantenan di UNESCO Paris y Wikimedia Foundation, e “Open Access Movement”.
Tambe a participa representantenan di comisionnan nacional pa UNESCO y hopi institucion di memoria y patrimonio.
E meta ta pa traha riba un trayecto pa yega na un recomendacion di UNESCO pa uzo y aceso liber di materialnan di patrimonio cultural, mas tanto den un forma digital(isa). Cultura Habri tin un papel esencial den conecta hende di diferente cultura y fomenta un ambiente di inclusion y diversidad. E ta yuda crea un comunidad global caminda hende por comparti y aprecia herencia cultural di diferente parti di mundo. E re-uzo creativo di e herencia cultural ta stimula creatividad y innovacion, asina permiti pa crea productonan cultural nobo y inspirativo.
E expertonan global cu a participa den e discusionnan a enfatisa e importancia di Cultura Habri pa reforsa resiliencia social y pa fomenta un ambiente di comparti conocemento y experiencia.
Sr. Peter Scholing como un experto for di un isla chikito, investigado na Biblioteca Nacional di Aruba y actual Presidente di e Comite Regional Latinoamerica y Caribe di e Programa Memoria di Mundo (Mowlac) di Unesco tambe tabata invita na e sesionnan. Hunto cu expertonan di varios otro pais manera, Merca, Canada, Australia, Indonesia, Morocco, Qatar, Uruguay, Mexico, Inglatera, Italia, Hulanda, Alemania y India, Aruba a intercambia di opinion y discuti tocante di Cultura Habri.
Sr. Scholing a haci uzo di e oportunidad pa comparti su experiencia y brinda informacion tocante Coleccion Aruba y e trabounan cu Aruba ta haci pa conserva nos herencianan cultural haciendo uzo di tecnologia. Alabes como pionero den e region Caribe ta promove e plataforma di e herencia digital pa ta un modelo pa implementa den region pa medio di cooperacion mutuo.
Minister di Finansa y Cultura Xiomara Maduro ta gradici Sr. Scholing pa e bon trabou cu e ta haciendo representado Aruba y tambe promoviendo e portal di herencia cultural www.coleccion.aw.