Aruba no tin brote di Dengue

E comunicado emiti ta haci un yamada di “alerta” pa brote (outbreak) di
casonan di dengue den Caribe referiendo na diferente isla, manera Corsou, Aruba, St.
Maarten (CAS) y tambe islanan Bonaire, St. Eustatius y Saba (BES).

DVG, como autoridad cu ta vigila malesanan infeccioso y malesanan transmiti pa sangura
na Aruba, ta informa comunidad cu e informacion den cual ta menciona Aruba como isla
experenciando brote di dengue ta incorecto. Na e momentonan aki NO tin brote di dengue na Aruba. Ta importante pa sa cu Dengue ta un malesa endemico cu durante henter aña tin casonan sporadico y DVG ta monitor e situacion local/ regional y mundial y ta actua mesora pa evita cu e casonan ta sigui subi. For di juli 2023 World Health Organization a informa tur su miembronan cu Dengue por bira un problema mundial pa motibo di cambio climatologico.
Door di esaki conhuntamente cu otro islanan den Caribe Hulandes a enforsa e vigilancia riba malesanan transmiti pa sangura.

Datonan di e seccion di Epidemiologia y Investigacion ta mustra cu den e ultimo luna di
2023, DVG a ricibi 13 notificacion di Dengue di cual a comproba 5 caso, 6 a sali negativo
y a registra 2 caso como probabel. Pa 2024 tin 6 notificacion haci pa Dengue, di cual 2 a
sali positivo, 2 negativo y 2 caso ta pendiente ainda di resultado di laboratorio. Compara
cu añanan anterior, esaki no ta diferente. Indicenan di control di GKMB tambe ta mustra
esaki y hospital no tin ningun caso di admision door di Dengue te cu fecha di publicacion
di e articulo aki.

DVG kier enfatisa cu Aruba no tin un “alerta” pa casonan di Dengue y den cualkier caso di un malesa cu ta un menasa pa salud publico, Departamento di Salud Publico (DVG) ta e instancia oficial pa informa comunidad debidamente.

Pa mas informacion like e pagina di Facebook di Directie Volksgezondheid DVG Aruba,
Follow DVG riba Instagram directie_volksgezondheid_aruba, subi www.dvg.aw, yama
5224200 of manda bo email na servicio@dvg.aw.