Apesar di situacion tenso na Venezuela, no tin motibo pa preocupacion
ORANJESTAD - Dia 10 di januari 2025 a tuma luga e inauguracion di e Presidente electo di Venezuela Nicolás Maduro. Reino Hulandes no ta reconoce e resultado di eleccion di Venezuela, mirando cu Union Europeo a pidi Nicolás Maduro pa proba su victoria y publica e actanan electoral. Pero e regimen di Maduro a nenga di cumpli cu e peticion. Pa e motibo aki, Reino Hulandes a keda riba e punto cu nan no ta reconoce e victoria ni su instalacion como e Presidente di Venezuela pa e siguiente termino presidencial.
E ponencia aki di Reino Hulandes a crea cierto tension den e relacion entre Reino Hulandes y Venezuela; cu e resultado cu Nicolás Maduro a tuma e decision cu embahada di Reino Hulandes na Caracas lo mester reduci su personal diplomatico Hulandes cu ta na Caracas. Actualmente, tin un total di 6 persona di Hulanda na Caracas di cual 3 lo mester bandona e pais. Esnan cu lo keda eynan lo ta e Embahadora mes cu 2 miembro mas di e personal y demas trahadonan local. Apesar cu e cantidad di personal ta reduci, e trabounan consular di Embahada, y e trabou di aplicacion pa visa lo continua mientras e Embahadora mes, cu sosten di e personal local, lo percura pa esakinan cana debidamente.
E decision di Nicolás Maduro sigur no a cay na agrado di Hulanda, y basa riba esaki, Minister di Relacion Exterior di Hulanda Caspar Veldkamp a ordena pa e Embahada di Venezuela na Den Haag tambe reduci su cantidad di diplomatico cu Venezuela tin na Hulanda. Eynan tin un total di 4 diplomatico di cual 2 lo mester bandona Hulanda. Esaki sigur ta un contra reaccion di Hulanda riba e decision di Nicolás Maduro, ya cu nan no a aprecia e decision tuma.
E contratiempo aki ta trece mas tension den e relacion entre Hulanda y Venezuela, pero di parti di Ministerio di Relacion Exterior a sigura cu e consulnan lo sigui haci nan trabou y cu e trabounan consular haci na e Embahada na Caracas pa cu ciudadanonan di pais Aruba lo continua. Pa loke ta e Consul di Venezuela na Aruba, trabounan tambe lo sigui debidamente.
Pa loke ta e tema di defensa, siman pasa Prome Minister a reuni cu Minister di Defensa di Reino Ruben Brekelmans cu tabata na Aruba. Durante e reunion a delibera extensamente riba e tema aki, na unda cu Minister Brekelmans a sigura cu, pa awor, Aruba no tin motibo pa preocupa. E situacion ta uno tenso y ta vigilando esaki di cerca, pa asina Aruba ta prepara den caso di cualkier eventualidad.
Prome Minister a expresa cu e situacion y e violacion di derecho humano na Venezuela ta un topico hopi preocupante, y cu ta riba su agenda di prioridad ya pa 7 aña caba cu e ta den Gobierno. E situacion aki ta uno cu Venezuela mes tin cu soluciona internamente, y Aruba no por yuda cu nada na e momentonan aki, solamente uni den oracion pa pronto bin un resolucion pa cu e situacion na Venezuela.