Agroalimentaria 2025 na Republica Dominicana
ORANJESTAD – Recientemente, Minister di Asunto Economico, Comunicacion y Desaroyo Sostenibel Geoffrey Wever demisionario hunto cu sr. Moises Sanchez Manzueta, Vice-Consul di Republica Dominicana, a extende un invitacion na companianan lo
E mision comercial aki ta un colaboracion hunto cu ProDominicana, Junta Agroempresarial Dominicana (JAD) y Consulado General di Republica Dominicana na Aruba.
E mision ta den cuadro di e feria internacional Agroalimentaria 2025, cu lo tuma luga di 28 te 31 di mei 2025. Agroalimentaria 2025 ta e plataforma mas grandi di Republica Dominicana pa sector agroalimentario, bebida y tabaco, cu ta atrae mas di 250 exportado Dominicano. Durante e feria, lo tin presentacion di productonan manera berdura, fruta, condimento, pasta, koffie, cacao, tabaco, cerbes, rum Dominicano y hopi mas.
Pakico e feria ta importante pa Aruba?
E situacion economico mundial ta cambia constantemente, cu aumento di tarifa riba importacion na Merca y otro paisnan clave. Aruba mester sigui diversifica su lasonan economico y explora opcionnan nobo pa importacion y inversion. Agroalimentaria 2025 ta un oportunidad ideal pa empresarionan Arubiano conecta cu e negoshinan Dominicano, amplia nan red comercial y explora colaboracionnan nobo.
E feria lo brinda entre otro:
- Oportunidad pa comerciantenan explora posibilidadnan nobo di colaboracion y importacion a traves di reunionan y ronda di negoshi cu exportadonan Dominicano;
- Un variedad di conferencia y presentacion riba e sector agroalimentario;
- Comerciantenan por experimenta y conoce e producto Dominicano directo di e origen.
Anochi informativo ta tuma luga: 13 di maart 2025
Pa tur negociante y persona interesa, Departamento di Asunto Economico ta organisa un anochi informativo dia 13 di maart proximo, na su oficina, cuminsando pa 6:30 PM. Durante e presentacion, lo brinda mas informacion riba e feria, e mision comercial y con bo por participa.
Participacion na e anochi informativo ta completamente gratis y sin compromiso. Pa registra mester scan e QR code (medionan social) of manda un email na s.meijer@deaci.aw.
Ministerio di Asunto Economico ta invita tur empresario Arubiano pa forma parti di e oportunidad aki, pa fortalece nos comercio y amplia e posibilidad di crecemento economico pa Aruba.
