Advertencia urgente: Casonan di secuestro y extorsion di Arubiano na Colombia

Practica preocupante

Mayoria biaha e victimanan ta hende homber cu ta reacciona riba anuncionan pa servicio sexual of masage erotico cu ta ser ofreci via medionan digital.
E cita ta ser haci sea na cas di e persona cu ta brinda e servicio of den camber di
hotel di e victima.

Metodo peligroso

E victima ta ser droga cu Scopolamina, un substancia sumamente poderoso y peligroso conoci como "Burundanga" of "Devil's Breath". Ta aplica Scopolamina di un manera scondi; sea suplando esaki den forma di polvo fini den cara di e victima, of ta pone esaki riba cuero di e dama. Asina cu e homber bin den contacto intimo cu e dama e ta droga inconscientemente.

Consecuencia

Bou influencia di Scopolamina, e victimanan ta perde boluntad y conocemento, haciendo nan sumamente facil pa manipula. Unabes inconsciente, e delincuente(nan) ta horta placa, carchi di credito, telefon y tur otro pertenencia di balor for di e victima. Hopi biaha, e delincuentenan ta haya acceso na datonan sensitivo como por ehempel datonan bancario, foto y mas. Esaki ta posibel pa motibo cu e victima, bou influencia di e substancia ta duna tur informacion sin opone.

Scopolamina

Scopolamina, ta un substancia di tipo alcaloide, deriva for di e planta “Datura
Stramonium”, conoci pa su efectonan halucinogeno y sedativo. E ta causa
temporalmente e perdida instantaneo di memoria, desorientacion y perdida di
boluntad. Tambe e ta haci cu e victima ta bira vulnerabel pa manipulacion.

Yamada urgente pa cautela

INTERPOL ta urgi un y tur pa ta extra cauteloso ora di reacciona riba e tipo di anuncionan aki como tambe ora di haci cita cu personanan desconoci den exterior. Keda semper alerto y proteha bo mes y bo sernan keri contra di e crimen serio aki.

Siguridad prome

Si bo ta planea pa biaha pa areanan caminda e tipo di practicanan aki ta conoci, sea extra cauteloso y comparti bo plan di biahe cu personanan di confiansa.

Pa mas informashon of si bo tin sospecho di un caso similar, tuma contacto inmediatamente cu INTERPOL Aruba of cu Cuerpo Policial.