400 mil florin inverti den digitalisacion den enseñansa

Edutech ta un fondo pa stimula innovacion y tecnologia den scolnan cu proyectonan piloto di innovacion diseña door di e scol, maestro y studiante.

E impacto y beneficio ta stimula participacion entre studiante y maestro, haci e klasnan mas interactivo y duna e studiantenan y maestronan e hermentnan pa sobresali den un mundo digital y desaroya “digital literacy’ den e scolnan rond Aruba.

Na 2017 Ministerio di Asunto General, Innovacion, Organisacion Gubernamental, Infrastructura y Planificacion Teritorial, a contempla cua ta e areanan cu mester haya extra atencion den e area di innovacion.

Na 2018, a cuminsa planea y na 2019 a cuminsa cu e proyecto piloto cu tabata yama E-learning. Den e proyecto, a traves di Futura, a scoge algun scol pa implementa proyectonan di innovacion.

A cuminsa cu e proyecto piloto den e scolnan basico entre otro Cacique Macuarima, Colegio Pastoor Kraanwinkel, Sint Franciscus College y Kleuter Cacique Aterima. Unabes cu e proyecto piloto a finalisa, Futura a bin cu e idea pa cambia e concepto y pa aña escolar 2022-2023 presenta Edutech.

400 mil florin reparti den 4 ciclo

Prome Minister, a remarca cu a pone un fondo di 400 mil florin disponibel pa cual tur scol por aplica atraves di e proyecto Edutech, cu e meta pa crea un plataforma pa stimula tur scol pa bin cu solucion pa e retonan cu nan ta enfrenta, unda cu ta pensa cu innovacion por ta un solucion.

‘Educacion ta e fundeshi pa nos isla por prospera, educacion ta empodera y fortifica nos comunidad y ta dirigi progreso. Nos sa tambe cu nos mundo ta cambiando na un nivel hopi rapido. Pesey e ta hopi importante pa nos ekipa nos generacion di hoben cu e hermentnan necesario pa por maneha e retonan y oportunidadnan den era digital. E unico manera cu por garantisa esaki ta door di siñanan e habilidadnan di siglo 21 pa nan por adapta y ta exitoso,' Prome Minister Wever - Croes a bisa.

Scolnan ganador di e prome 3 ciclonan di Edutech

Cu ayudo di e fondo di Edutech e scolnan cu a gana, por a realisa diferente meta.

Aurora Scol Preparatorio Noord, Colegio Bon Bini na Playa, Pius X School na Dakota, y Maria Goretti College na Paradera lo cambia e borchinan tradicional pa digital. Ademas lo ekipa e klasnan cu diferente material, manera tablets of laptops pa stimula participacion, haci e lesnan mas interactivo y na mes momento logra realisa e metanan di desaroyo sostenibel (SDGs).

Colegio EPI a implementa "Columbus Kompas", un metodo pa por midi e desaroyo digital y progreso di studiantenan durante un aña escolar. EduCampus lo uza e fondonan pa crea un "Modular MakerSpace" cu lo funciona como un ‘incubator’ y haci innovacion mas accesibel na nos hobenan.

Aplicacion ta habri pa ciclo 4

Pa ciclo 4 ainda scolnan tin tempo pa aplica, pa sinta hunto y manda tur idea via e website edutecharuba.org. E deadline ta 30 di juni 2023.

Prome Minister a gradici e team di Futura cu a haci e proyecto di Edutech un realidad y a gradici tur docente y e veld di enseñanza cu a aplica pa e fondo y bin cu ideanan nobo pa trece nos educacion den e era nobo.