URK4
URK4 ta duna un bista riba e realisacion di Presupuesto 2023, ta contene informacion di, entre otro, debe di Aruba, maneho financiero hiba, pagonan di proyectonan haci uzando e vehiculo financiero di Public Private Partnership (PPP), estado di likides di Gobierno y ta duna un bista riba e resultado financiero di e sector colectivo di Aruba.

Indicadornan cardinal 

E resultado financiero di 2023 tin un surplus di 2,7% cu ta mas halto cu e 1% cu ta e norma pa e surplus pa 2023. Por mira cu e saldo primario cual ta e saldo sin conta e gastonan di interes, ta rond di 6,7%. E quota di debe di Pais Aruba ta mustra un tendencia di ta bahando y den 2023 a yega 81,6% despues cu e tabata na 96,6% na 2022, 108% na 2021 y 127,1% na 2020 durante e pandemia. A contene e gastonan di personal na 457 miyon florin cu ta bou e norma di 479 miyon florin. Segun e grafico di desaroyo di credibilidad financiero di Fitch Rating y Standard and Poor's (S&P) den e ultimo 20 añanan, Aruba su credibilidad financiero a baha den e añanan di pandemia y cu esaki awo ta subiendo. Aruba a perde su investment rating cerca Fitch, pero a mantene esaki cerca S&P. Gobierno a cuminsa traha tambe cu e compania di rating Moody's kende a score Aruba cu un investment rating.

Resumen financiero

E resultado financiero di Pais Aruba den aña 2023, ta duna un surplus di 2,7% cu ta un suma di 183,1 miyon florin. E resultado di e Sector Colectivo, cual ta e resultado financiero di Gobierno hunto cu AZV, SVB, ATA, Serlimar, Stichting EPB y Universidad di Aruba, ta bira un surplus di 4,1% cu ta 282 miyon florin. Pa 2023 Aruba ta cumpli cu e norma financiero di surplus di 1% di GDP.

Tur informacion financiero ta publico

E Uitvoeringsraportage di kwartaal 4 di 2023 URK 4 ta un documento publico cu ta contene hopi mas informacion financiero y esaki ta pubica riba e websitenan di gobierno www.overheid.aw, www.gobierno.aw y www.government.aw bou di e pagina actualidad - rapport y document - supervicion financiero.