Telefon pa Hubentud 131, hunto cu Pan American Development Foundation (PADF), a produci e pelicula cortico “My Story”, unda hobennan di diferente nacionalidad ta comparti un dia den bida di cada un, pa cada un siña di e otro, compronde otro miho y asina fomenta mas tolerancia, respet y empatia. Ademas, como parti di e proyecto di “My Story”, tawatin un exposicion di obra di arte, unda e hobennan di diferente nacionalidad a expresa nan mes di un forma conmovedor.

Prome Minister Evelyn Wever-Croes cu a tende e premiere a keda impresiona y a menciona cu a trata di obranan di arte impactante cu a refleha e sentimientonan pero tambe e talento inmenso cu ta reina bou di e hobennan.

E mundo ta yena di diversidad, cu mas di 100 nacionalidad y Aruba ta un testimonio di esey. "My Story" ta un proyecto cu ta ilumina e importancia di nos aceptacion y respet pa otro. E hobennan, tanto local como internacional, a bin hunto pa siña di otro y crece hunto. Nan ta un inspiracion pa otronan y a demostrando cu no obstante di unda nan ta bin, nan por traha man den man pa un miho futuro. 

E hobennan a bin for di diferente parti di mundo y cultura, pero a descubri forsa den nan diferencianan y a skirbi un storia nobo, un historia di unidad y di amor. Nan ta un ehempel pa Aruba henter, demostrando cu nan tin e poder pa supera e diferencianan cu ta separa nan. 
Diversidad no ta un obstaculo, sino mas bien un fortaleza. 

Prome Minister ta gradici tur esnan cu a contribui na e exito di "My Story." E trabao aki ta duna speransa y ta un ehempel pa otro paisnan.