E seminario aki ta un colaboracion entre Fundacion Plan di Bida, Bold Properties y Ministerio di Asunto Economico. E seminario lo tuma luga na Renaissance Convention Center, cuminsando pa 8:30 di mainta y ta completamente gratis.

Meta di e seminario ta pa empodera comunidad cu informacion valioso relaciona cu e derecho cu nos tin di por bira doño di nos propio cas. Conocemento ta necesario pa maneha e rekisitonan efectivamente pa por ehempel; cualifica pa un prestamo hipotecario a base di rekisitonan comun. Ademas tin otro costonan mara na rekisitonan cu mester ta consciente di nan, asina un persona por presupuesta y planifica miho pa su futuro inversion.

Ministerio di Asunto Economico ta haci diferente actividad cu ta dirigi pa stimula nos hendenan pa ta mas consciente ora di tuma decision financiero na nan benificio.

E seminario lo conta cu e presencia di diferente orado distingui, incluyendo notario Theodore Johnson y Ralph Yarzagaray, analista financiero, realtors, y un representante di un banco local cu lo splica e proceso pa aplica pa un hipoteca. Tambe lo tin un representante di DIP cu lo brinda informacion di parti di gobierno riba rekisitonan, gastonan annual, y zonificacion.

Informa y educa e comunidad ta esencial pa empodera nan pa realisa nan soño di por logra yega na nan propio cas. “Poder Financiero: E Caminda pa bo Cas” lo ta un experiencia valioso pa cualkier persona y famia cu lo contribui pa cambio den bo bida.