Di e manera aki oficialmente a institui e “stuurgroep” nacional di Scol Saludabel.

E programa Scol Saludabel ta forma parti di e Plan Nacional di prevencion di malesa no transmisibel. E plan aki ta un plan integral cu a cuminsa na aña 2020 pero cu a bay "on hold" pa motibo di e pandemia.

Unabes cu a pandemia a termina e reinicia e plan nacional di prevencion mas determinacion cu nunca.

Tres ministerio a uni pa duna sosten financiero na e programa cu ta enfoca den crea un estilo di bida saludabel y implementa esaki como rutina pa scolnan y nan alumno.Den e programa Scol Saludabel no solamente ta enfoca riba salud fisico pero tambe riba salud mental, movecion y bienistar total di e mucha. Mas salud un mucha ta, mas productivo e ta.

Otro programa cu ta carga sosten di gobierno ta JUMP18, lansa hunto cu Hospital Horacio Oduber (HOH) bou guia di specialista di mucha dr. Busari. JUMP18 ta un programa multidisciplinario den maneho di obesidad den muchanan, cu e meta pa yuda mayornan y muchanan biba un bida mas saludabel por medio di educacion y retando nan percepcion limita.

Por medio di e proceso aki, ta crea e acceso pa mayornan y nan muchanan bolbe descubri nan balor berdadero hunto cu un conocemento mas profundo den loke ta nutricion y salud.

Actualmente tin 10 scol cu ta participando na e programa di scol saludabel y e meta ta pa tur scol basico y scol secundario participa.

Minister di Turismo y Salud Publico, sr. Dangui Oduber a gradici su colega Minister Endy Croes y Minister Rocco Tjon pa nan sosten pero tambe Departamento di Salud Publico / Jeugdgezondheidszorg, Departamento di Asunto Social, SKOA, SPCOA, IPA, DPS y GSA pa nan participiacion.