Resiliencia ambiental na e Earth Day Forum 2024

Pa subraya e urgencia di resiliencia climatico a organisa Earth Day Forum 2024 cu a trece varios grupo di interes hunto pa intercambia conocemento y experiencia tocante cambio climatico. Durante di e Forum, keynote speaker Dr. Ryan Peterson, Presidente di e Conseho Nacional di Resilencia Climatico(NCRC), a elabora riba e progreso haci den proteccion ambiental y e stapnan cu falta.  A organisa tres panel di discusion tocante e impactonan di cambio climatico, adaptacionnan necesario, oportunidadnan pa financiamento y inversion pa aumenta resiliencia climatico.

Earth Day Forum a conduci na firmamento di un acuerdo entre gruponan di interes pa continua colaboracion pa medio di e Conseho Nacional di Resilencia Climatico (NCRC) y Stimson Center. Cu e colaboracion estableci por enfoca riba implementacion di un "Climate and Ocean Risk Vulnerability Index" (CORVI) y un roadmap pa Aruba combati efectonan di cambio climatico. E partnernan cu a firma e acuerdo aki ta Gobierno di Aruba, Aruba Airport Authority N.V., Arubabank N.V., Aruba Hotel and Tourism Association, Banco Central, MetaCorp N.V., Setar N.V., WEB Aruba N.V. y Utilities Aruba N.V.

MIrando bek riba e prome Earth Day Forum aña pasa, den cual a lansa e trayecto legislativo pa Derecho di Naturalesa, Minister Arends a remarca cu aña pasa a establece e caminda legislativo pa Derecho di Naturalesa, y e aña aki ta enfrenta cambio climatico directamente. Esaki ta e momento pa sigura cu cada sector ta mobilisa pa atende cu e desafionan ambiental cu nos ta enfrenta.