Sr. Peter van den Bosch, CEO di Stichting BKR, a indica cu na Hulanda ya tin registracion di credito y comparticion di informacion a base boluntario entre mayoria instancia financiero, mientras apenas ta formalisando legislacion.

Na Aruba a pasa ley cu ta forma e fundeshi pa cuminsa cu e proceso di structura e registracion debidamente. Awo e implementacion di e krediet registratie stelsel ta canando su caminda, pa cual e reunion cu BKR tabata na su ora. E mandatario a sigura cu tin bon comunicacion y cooperacion cu BKR, kende ta dispuesto pa brinda asistencia na Aruba pa implementacion di e krediet registratie stelsel, algo cu na Hulanda ta existi ya for di 1965.

Na Aruba 3 di cada 10 cas tin mas debe cu entrada. Debe excesivo por resulta den problema grandi social-economico pa famianan, cu su efecto riba henter comunidad. Ta necesario pa preveni practica di extende credito (excesivo) sin controla e persona su habilidad pa paga bek. Door di no tin informacion necesario ta trece cune riesgo adicional pa tur banco of instancia di credito. Un sistema di control di credito ta duna e banco of instancia mas siguransa cu e persona cu ta fia placa por paga bek, pues tin menos riesgo. Importante ta cu e sistema aki ta proteha e consumidor di hinca su mes den compromiso financiero cu despues ta bira dificil pa cumpli cu nan, y tur consecuencia negativo pa nos comunidad.

E ley pa un krediet registratie stelsel tambe ta proteha e consumidor su informacion. Esaki ta un di e puntonan di salida importante pa minister Wever. Un base legal pa structura intercambio di informacion na un forma sigur ta necesario, pa asina e instancia tin su siguransa, pero tambe mester garantisa e consumidor su privacidad.

Minister Geoffrey Wever ta gradici na Sr. Peter van den Bosch y BKR pa un reunion fructifero, y nan disponibilidad pa yuda Aruba implementa un sistema di registracion di credito.