ORANJESTAD -  Recientemente, a tuma luga pa di dos biaha, un training pisa pa recluta miembronan nobo pa e Team di Aresto di Cuerpo Policial. 

Team di Aresto of "A.T." ta considera un team profesional cu ta enfoca riba diferente area pero un di e areanan importante ta pa pone man riba sospechoso cu ta considera peligroso.

Cada tanto tempo, ta recluta miembronan nobo pa e team elite di KPA. E proceso di recluta ta hopi intensivo y ta rekeri varios training pisa cu a tuma luga durante e ultimo lunanan cu a transcuri. E proceso largo y intensivo ta pa yega na e calidad y habilidad maximo di cada cursista cu a participa den e training aki.

E training aki ta den cooperacion cu tur pais den Reino Hulandes esta Hulanda, Aruba, Corsou, Boneiro y Sint-Maarten. Tambe a conta cu sosten di miembronan specialisa di e diferente cuerponan policial di cada Pais den Reino cu a yuda den e entrenamento pisa aki.

Team di Aresto di Aruba conhuntamente cu coleganan di Reino Hulandes a duna e training aki na Aruba. Cuerpo Policial ta yama danki na e team di DSI Hulanda y Mariniers Kazerne Savaneta pa nan sosten.

Alto Comisario Ramon Arnhem ta sumamente orguyoso y ta felicita su coleganan nobo di Team di Aresto cu a ricibi nan baret blauw. E opleiding aki tabata posibel danki na esfuerso colectivo di e cuerponan di Reino, coleganan Korpschef, DSI Hulanda y Marinierskazerne Savaneta. 
 

Opleiding Team di Aresto na Aruba.