Miembronan di NCRC, stakeholders y ministernan cu a haci di e actividad aki un miniterraad extraordinario p’afo di Bestuurskantoor, a reuni na La Cabana Beach Resort. E enfoke principal di e encuentro tabata pa presenta e timeline cu NCRC lo sigui y inicia e estudio di CORVI (Climate and Ocean Risk Vulnerability Index) di Stimson Center. A conta cu presencia di dos experto cu ta lidera e CORVI, sra. Sally Yozell cu ta directora di e programa di sigurididad ambiental di Stimson Center, y economista y ambientalista sra. Tracy Rouleau. Nan a elabora riba e metodonan di e estudio y contesta diferente pregunta.

E CORVI ta un herment fundamental den Aruba su adaptacion pa enfrenta cambio climatico. E ta consisti di un serie di indicadonan cu ta yuda nos compronde con cambio climatico ta impacta cierto areanan urbano for di un perspectiva ambiental, economico y social. Esaki lo percura pa por crea maneho basa riba data y informacion di calidad halto.

Resiliensa pa enfrenta cambio climatico ta fundamental pa nos sobrevivencia. Aruba ta un di e paisnan di mundo unda ta haci mas calor y ta posiciona number 8 riba un lista di 2022 di e paisnan cu e averahe di temperatura mas halto globalmente.

E reunion cu a mira participacion activo di tur skina, incluyendo di nos prome y demas minister, ta un bon comienso di e caminda nos dilanti. Ta di suma importancia pa tur sector di nos isla aborda e tematica di cambio climatico.