Studiantenan di Educampus como parti di nan Social Studies, a ofrece pa diseña e logo pa e proyecto aki. A forma gruponan di studiante y bao guia di docente Kenny Meyers, a diseña algun concepto y na final un comision a scoge e logo ganado cu ta un diseño di Sarah-Isabelle Lee, Silvia-Andrea Lee y Nicolas Lee.

Na final a adapta e logo un poco cu ta consisti di varios elemento:

• Cadena: E cadena kibra ta refleha e liberacion di sclavitud, fin di un etapa scur den nos historia y e (anhelo di) crecemento di e ser humano den un comienso nobo.
• Boto: E boto ta representa e forma con a transporta e esclavonan na nos isla, e rumbo actual cu nos kier tuma: sigui nabega den un direccion nobo.
• Solo: E simbolo di un comienso nobo: despues di e abolicion di sclavitud, Aruba a cuminsa un etapa nobo den e desaroyo socio-economico di nos pais y manera di dia habri y solo sali, nos cada un tin un oportunidad nobo pa progresa.
• Lama: Nos isla ta rondona pa lama y riba nos awanan a transporta esclavonan pa Aruba. Riba e mesun awanan aki nos tin cu fiha nos bista riba un futuro y cambia rumbo pa nabega den e direccion corecto.
• Slogan: ‘Sclavitud ta parti di nos historia’. Nos tin rasgo den nos presente pero door di ta na altura di esaki, ta hunto so nos por percura pa sclavitud no forma parti di nos presente y futuro.

Gobierno a gradici Educampus pa nan colaboracion y a entrega cada un di e studiantenan ganado di e diseño y directora di Educampus un muestra di aprecio pa nan

bunita contribucion na e campaña di conscientisacion abolicion di sclavitud.