E Leerorkest 5 Schools Concert ta esun di mas grandi te awo y a tuma luga na Gloria Theatre unda un sala yen por a disfruta di un concierto di muchanan di 5 scol basico. E scolnan participante tawata Graf von Zinzendorf Basisschool, Prinses Amalia Basisschool, Colegio Laura Wernet Paskel, Aruba Adventist Academy y St. Paulus Basisschool.

Musica ta un factor determinante den desaroyo y crecemento di un mucha. Muchanan cu ta siña toca un instrument desde chikito, ta desaroya mas confiansa den nan mes. Asina nan lo tin e mesun confiansa ora di enfrenta otro tareanan, retonan y actividadnan den nan bida y logra loke nan propone.

Prome Minister ta orguyoso cu gobierno por a financia Leerorkest mirando e rol importante cu esaki tin den desaroyo di e muchanan. Ora inculca den muchanan e amor pa musica, e ta resalta nan talento y confiansa, y esaki ta algo cu ta yuda nan mes pa nan futuro y ta yuda nos como pais. Ademas ta felicita tur e muchanan cu a forma parti di e Leerorkest 5 Schools Concert pa nan excelente presentacion.