Den nan raport Aruba: Staff Concluding Statement of the 2023 Article IV Mission, IMF ta enfoca riba topico fiscal y economico. A tuma nota positivo di e crecemento economico remarcabel di Aruba despues di pandemia, danki no solamente na mas cantidad di turista pero tambe e cantidad cu nan ta gasta durante nan estadia. "Economic activity rebounded strongly as the pandemic effects waned", segun e raport.

Tambe a duna indicacion riba reforma structural cu ainda falta y ta necesario pa sigui stimula crecemento, cual entre otro ta enfoca riba e facilidad di haci negoshi "ease of doing business". Den punto number 12, IMF ta nota "Comprehensive structural reforms are needed to boost potential growth". Esaki ta indica cu ainda falta mas reforma pa minimalisa obstaculo y reduci "red tape" cu por stroba comercio. Tambe mester sigui promove entrepreneurship y añadi na balor agrega di turismo, esfuerso cu ya caba haciendo.

IMF ta conclui si cu "the recently introduced Business Policy Guidelines and the efforts to enhance transition to the digital economy are steps in the right direction". Esaki segun Gobierno ta un nota positivo y un afirmacion cu e trabou y esfuerso haci ta pasonan den e bon direccion.

Na october 2022 Gobierno a introduci e maneho pa permiso di negoshi, e asina yama Vestigingsbeleid, modernisa, simplifica y digitalisa, caminda a reduci e tempo di espera pa permiso. E cambio principal den e Vestigingsbeleid 2022 ta: reduccion di “red-tape”, digitalisacion completo di e proceso permiso di negoshi, ampliacion di categoria di persona cu no mester pidi un permiso mas, stimula inversion den centro di Oranjestad y San Nicolas, stimula diversificacion di Aruba su economia atraves di e “six promising sectors”, duna companianan chikito posibilidad pa establece den nan cas (zona residencial) y introduci principio di sostenibilidad den maneho.