Land Academy Aruba ta un plataforma digital di enseñansa gratis pa tur empleado publico. E proyecto aki a keda introduci dia 2 di Mei, 2023, den cuadro di introduccion di e programa di "Prestatie Management" manera stipula den e landspakket.

Apesar cu e proyecto aki ta activo un par di siman caba, a scoge pa duna un rueda di prensa pa asina mas empleado publico ta informa di e proyecto y tur loke e ta ofrece.

E proyecto aki ta hopi importante y ta duna e empleado publico acceso na centenares di curso, workshops y webinars cu e mes por scoge. Mirando cu un di e puntonan den landspakket ta e introduccion di "Prestatie Management", a wak e necesidad pa duna e hermentnan necesario pa asina yuda e empleado publico crece den nan trabao y/of como persona.

Land Academy Aruba ta un plataforma digital di enseñansa cu ta brinda tur empleado publico un variedad di herment pa yuda nan crece. Tin mas cu 700 forma cu cada persona por scoge pa desaroya nan mes. E programa ta disponibel 24/7 y cada persona por dicidi riba ki tempo nan lo kier bay. E empleado publico no necesariamente por sigui curso cu ta relaciona specificamente cu nan trabao, sino por scoge cualkier curso pa mehora su mes sea personalmente of profesionalmente. Ta comproba cu cada trahado y/of persona cu inverti den su mes, sigui traha riba su mes pa asina desaroya mas habilidad, ta un persona mas feliz, segun Prome Minister.

Pa mas informacion, subi e link di Departamento di Recurso Humano Aruba (DRH) https://hrportaal.drh.gov.aw/.