ORANJESTAD – Gobierno di Aruba, algun tempo atras e decreta luna di april como Luna Nacional di Conscientisacion Contra Abuso di Mucha. 

Den e luna aki, kier conscientisa comunidad riba e problema di maltrato di mucha y abuso sexual di mucha y a organisa varios actividad pa habri e discusion riba e tema aki. 
Pa culmina e luna contra abuso di mucha, Gobierno ta organisa un Forum Nacional riba Abuso di Mucha, cu lo ta "live" na TeleAruba dia 30 di april 2024 di 8.30 pm pa 10.30 pm. Comunidad completo tin e oportunidad di haci pregunta durante di e Forum y por manda nan via WhatsApp na +297 5972323. 

E forum lo conta cu varios orado di diferente instancia, entre otro:

  • Glendeline Maldonado; MW’er/ Pedagoog/ Onderwijs;
  • Suzette Kock; Abogado;
  • Johnny Boekhoudt; Pro Justicia Rapporteur/ Werkgroep Forensiche zorg en GZ/ Klinisch & Forensisch/ Psycholoog/ Jeugd/ OC;
  • Phil Godoy; Psycholoog/ MDFT terapeut/ FSMA Respaldo;
  • Juan Gomes; Rechercheur/ JZP/ Justitie ;
  • Janice Hooft; Dokter/ Wit Gele Kruis & JGZ na DVG;
  • Moderador; Jonathan Trinidad; MBA/ Consultant/ Onderwijs.

Apesar cu luna di april ta yegando su fin, Gobierno lo sigui traha durante henter e aña cu tur instancia riba e tereno aki, y ta urgi comunidad pa sigui pone di nan parti den combati abuso di mucha ya cu mayoria di e abusonan cu ta tuma luga ta door di un persona cerca di e famia. Hunto por logra protega nos muchanan.

Forum Nacional riba abuso di mucha