Aruba ta tumando paso pa un modelo economico mas sostenibel y inclusivo. Cu e MoU aki entre Gobierno di Aruba y Omega Engineering Curacao, e meta ta pa duna sosten na empresarionan local cu desaroyo di sistemanan di green house altamente eficiente den uzo di coriente y awa pa cultivo di fruta y berdura na un escala comercial cu anteriormente no tabata posibel na Aruba.

Omega Engineering ta suministra e sistema di green house, solucion di friamento y e tecnologia corespondiente. E cooperacion mester stimula innovacion sostenibel, diversificacion economico y inclusion di (mas) participante den e industria, fortificando e sector di agricultura na Aruba.

E acuerdo ta stipula cu e ministerionan lo minimalisa mas tanto posibel e obstaculonan pa empresarionan local cu ta desea implementa un sistema di green house manera esunnan cu Omega ta provee, pa sigura implementacion rapido. Sinembargo, e ministerionan tambe lo apoya tecnologia similar di otro empresanan (third party) cu tambe ta contribui na Aruba su ambicion di agricultura sostenibel sin duna exclusividad na Omega Engineering.

Segun Gobierno, e MoU aki ta forma parti di e plan accion nacional di Aruba pa cambia su modelo economico pa uno mas sostenibel y inclusivo, mientras ta promove mas seguridad alimenticio riba nos isla.