Riba e fecha aki, Directie Natuur en Milieu (DNM) kier enfatisa cu tur e 6 especienan di turtuga di lama ta protegi pa e ley Landsbesluit Bescherming inheemse flora en fauna. 

Ta trata di e especienan protegi; 

• Caret (Eretmochelys imbricata) ; 
• Cawama (Caretta caretta) ;
• Turtuga blanco (Chelonian mydas) ;
• Driekiel (Dermochelys coriacea) ;
• Kemp’s Ridley (Lepidochelys kempii) ;
• Olive Green turtle (Lepidochelys olivacea). 

Tur aña tin turtuga di lama ta subi nos beachnan pa pone webo, pero ta  enfrenta hopi reto di actividad acuatico. Boto y ‘waverunner’ cu no ta cauteloso pa cu turtuganan di lama, hotelnan no ta cumpli cu e reglanan stipula pa cu ponemento y kitamento di e stulnan di lama cu turistanan ta uza riba beach y ultimamente hasta actividadnan riba beach cu demasiado iluminacion ta obstaculisa y confundi e turtuganan di lama pa subi beach y pone webo. P’esey DNM a publica e “standard operating procedures (SOP) pa cu iluminacion cu ta den bon practica cu bida di animalnan- manera por ehempel turtuganan di lama. E SOP ta disponibel riba dnmaruba.org.  

Polucion di lama y beach cu plastic tambe ta crea un peliger pa e bida marino incluyendo e turtuga di lama. Plastic ta un peliger grandi pa e existencia e turtuga di lama, y por causa nan extincion di manera acelera. Turtuganan di lama ta confundi plastic den lama cu cuminda y ta come esaki cu tur su consecuencia. P’esey DNM ta urgi comunidad pa cambia e patronchi pa cu uzo di plastic di un solo uzo pa opcionnan mas duradero. 

Conoce un tiki mas di e tortuga di lama:

• Luz artificial ta causa desorientacion y ta pone cu nan ta bay den direccion robes ora di pone webo;
• turtuga femenino ta bolbe na e mes un beach na unda nan a nace. Nan ta masha sensitivo y tin un habilidad increibel di nabega distancianan largo.
• nan no tin djiente. Nan cachete ta traha di mesun componente cu huña (keratin); 
• ta calcula cu no mas di 1 den 1000 webo di turtuga di lama lo sobrevivi y yega na bira un turtuga adulto. 
• nan ta prefera cuminda cu color cora, oranje y geel. Nan curiosidad pa explora e colornan aki den lama ta pone cu nan por come hopi plastic. 

Haci bo contribucion, yuda haci un pida beach limpi di desperdicio y specialmente liber di plastic y otro obheto cu por stroba e turtuga di lama di subi beach pone webo. Si durante bo bishita na beach bo a coba buraco, corda tapa esaki prome cu solo baha y bo bay cas. E organisacion TurtugAruba ta hasi un trabao inmenso, no solamente di conscientisacion di e especienan pero ta organisa varios accion di limpiesa na diferente beach. Sea activo den nos comunidad, bira un boluntario di un organisacion y yuda conserva y proteha e turtuganan di lama cu ta bini Aruba.