Na 1972, Asamblea General di Nacionnan Uni a adopta un resolucion pa designa 5 di juni como Dia Mundial di Medio Ambiente pa crea conscientisacion pa proteccion di medio ambiente y awe, 50 aña despues, a bira e plataforma global cu mas alcanse publico riba e tema medio ambiental. E tema pa 2023 ta #BeatPlasticPollution y ta un continuacion di e tema cu a inicia na 2018 pa combati polucion di plastic.

Côte d'Ivoire, den colaboracion cu Hulanda, ta anfitrion e aña aki di Dia Mundial di Medio Ambiente,   cu tin como tema Solucion pa polucion di plastic.  

E paso cu gobiernonan y comercio a tuma pa combati polucion di plastic ta e consecuencia di e accion humano.
Na 2016, Aruba a introduci e ley pa prohibi uzo di saco di plastic y na 2019 a introduci e ley “milieuschadelijke producten” cu ta prohibi entre otro e importacion, distribuimento y uzo di plastic di un solo uzo manera forki, tayo, cups di plastic. E ley ta inclui cambio den e Algemene Politie Verordening (APV), y ta prohibi uzo di blaas den aire liber.

E responsabilidad pa medio ambiente no ta tarea di gobierno so, pero comunidad mester tin un rol mas proactivo y cambia su patronchi di consumo pa uno mas “milieuvriendelijk”. Un demanda pa producto mas "milieuvriendelijk" di parti consumidor lo encurasha comercio pa adapta nan mercancia y sea mas  innovativo.

Mayoria producto di un manera of otro tin componente di plastic. Plastic a bira algo comun y relativamente barata pa produci, e ta dura hopi, ta flexibel y facil pa transporta pero ta deriva for di  combustibel fosil cual ta un di e causantenan principal di polucion. Si no tuma accion awo pa frena e produccion di plastic, pa 2060 e cantidad di plastic den circulacion lo triplifica.E polucion di plastic tin un impacto negativo pa nos ecosistema, bida, salud y bienestar general pero tambe pa economia mundial. Esaki ta motibo pa cambia di economia linear pa uno circular, cu ta mas sostenibel y saludabel.

Kico tur por haci awe pa combati polucion di plastic?

• Scoge productonan reusabel y No esunnan di plastic;
• Pidi bo restaurant, supermercado y importado pa haci cambionan pa producto sostenibel;
• Demanda maneho di sushedad responsabel.
• Encurasha esnan cu ta tuma decision a apoya manehonan cu ta den cuadro di economia circular.

Pa mas informacion bishita www.dnmaruba.org riba nan pagina di Facebook