Nos mangelnan ta den peligro y ta estima cu mas cu 3/4 di mangelnan rond mundo lo ta den peligro y hunto cu nan, henter e ecosistema cu ta depende di nan. Mangel ta e conexion entre tera y lama. E raisnan den awa salo y tera exponi na marea, ta forma un universo raro y fragil; un refugio di bida cu mester ta proteha.

E mangelnan ta forma un habitat diverso den cual varios especie ta busca refugio, cuminda y ta reproduci. E sistema aki ta vital tambe pa ser humano, mirando cu e mangelnan ta duna proteccion di erosion na costa y ta fuente di alimentacion pa varios hende.

Door di cambio climatico, mester haci mas esfuerso, mirando cu e mangelnan ta crucial den deposita carbon. Esaki ta motibo suficiente pa UNESCO bin cu e iniciativa pa restaura e mangelnan den siete país  Latino Americano. E proyecto aki no solamente lo trece oportunidad economico pa comunidadnan local, pero ta encurasha intercambio di experticio entre populacion local y indigena cu comunidad cientifico.

Na Aruba tin diferente proyecto andando y organisacion cu ta activamente involvi den proteccion y restauracion di nos mangelnan. UNESCO Aruba tambe ta haci esfuerso pa, hunto cu nan partnernan y pa medio di UNESCO su Geopark, Sitionan di Patrimonio Mundial (WH), introduci un reserva biosferico (Man and Biosphere label (MAB)) y mas literatura di lama na scol a traves di e Ocean Literacy program.