Esaki ta encera e enfoke riba e importancia pa nos generacion restaura e tera y suela, stop formacion di desierto (desertification) y traha riba resiliencia contra secura. Rond mundo, hopi ecosistema ta bou menasa manera areanan di mondi, terenonan cu a seca, lagonan y areanan natural di cua humanidad ta depende di dje a yega na su punto cu no tin buelta atras. Directie Natuur en Milieu (DNM) ta reconoce e urgencia pa cuida nos medio ambiente pa bienestar di nos generacion actual y esun di futuro.

Ta crucial pa reconoce cu e salud di nos planeta ta directamente liga na nos propio salud y bienestar. Contaminacion di ecosistemanan, perdida di biodiversidad y cambio climatico ta menasa real cu ta afecta nos tur. 

Kico nos por haci pa restaura nos medio ambiente:

• Reduci nos consumo y reduci e cantidad di desperdicio;
• cumpra fruta y berdura for di productornan local y di e temporada;
• Restaura y conserva areanan cu ta importante pa nos biodiversidad;
• planta mata y cuida nos areanan cu ta berde di mata. Uni na gruponan cu ta planta manera Ban Lanta y Planta como boluntario. Participa na plantamento di matanan di mangel pa yuda proteha nos costanan y aporta na engrandece bida marino;
• accion di Limpiesa den bario y na lama. Participa activamente na accionnan di limpiesa manera Limpi Limpi;
• educa otro persona riba importancia di sostenibilidad y conservacion.

Hunto nos por laga un impacto positivo riba nos tera pa bienestar di generacionnan futuro.

Paisnan mester cumpli cu tur compromiso pa restaura ecosistema y suela degrada manera stipula den e “Kunming-Montreal Global Biodiversity Framework” (GBF) y uza nan plannan nobo di accion climatico nacional pa 2030. 

E National Biodiversity Strategic and Action Plan (NBSAP) “Plan di Maneho pa Naturalesa di Aruba” ta e documento di maneho basa riba e Global Biodiversity Framework (GBF) cu ta e resultado di e conferencia di e partidonan na e Convention of Biodiversity (COP 15) na 2022. Na Aruba, ta trahando riba e meta- y obhetivonan cu tin prioridad. E lista di prioridad den e concepto “Plan di Maneho pa Naturalesa di Aruba” ta cerca stakeholdernan y despues, hunto cu e NBSAP lo bay Parlamento pa aprobacion.