Esaki tabata un accion en conhunto cu Departamento di Aviacion Civil di Antias Frances.

Aruba tin un team di 4 inspector cu ta cualifica pa conduci inspeccion di rampa segun e sistema Europeo di “SAFA” (Safety Assessment of Foreign Aircraft). Ta procesa e resultado di e inspeccionnan den e SAFA database cu ta contene resultadonan di inspeccionnan haci na otro paisnan cu ta afilia na SAFA, di manera cu por compara y analisa e data aki efectivamente.

Como parti di un acuerdo di cooperacion cu Francia, inspectornan di Aruba ta haci e inspeccionnan hunto cu inspectornan di Antias Frances, cu tambe ta parti di e red di SAFA. Tin biaha esaki ta tuma luga na Aruba, y tin biaha esaki ta tuma luga den Antias Frances cu ta Saint Martin, St-Barthélemy, Guadeloupe y Martinique.  E cooperacion aki ta yuda pa standarisa e manera di traha y pa siña for di otro. E siman aki a toca pa inspectornan di Antias Frances haci inspeccionnan na Aruba hunto cu nan coleganan di Aruba.

A inspecciona un total di 17 avion di tur tipo, grandi y chikito, di pasahero y carga. Ta manda cualkier discrepancia haya pa e compania concerni pa asina nan tuma e medida di coreccion necesario. Departamento di Aviacion Civil ta keda monitor implementacion di esaki te ora cu tur coreccion tuma luga manera cu mester ta.

Durante añanan ta nota un tendencia na Aruba cu e discrepancianan constata ta birando menos den cantidad y den severidad. Tambe ta mira cu companianan di aviacion ta tuma e inspeccionnan na serio y ta tuma medidanan necesario di precaucion prome cu haci nan vuelo pa Aruba. Esaki ta mustra e balor agrega di e programa di SAFA, cu realmente ta contribuyendo pa eleva e siguridad operacional di aviacion na Aruba.

Departamento di Aviacion Civil lo keda haci e tipo di inspeccionnan aki na Aruba, no solamente pa eleva e siguridad operacional mas ainda, pero tambe pa sigura cu e nivel halto aki ta keda manteni di un manera duradero, mirando e importancia di aviacion pa e economia di nos pais.