Cuerpo Consular di Aruba ta representa tur Consul Profesional y Consul Honorario cu ta estableci na Aruba. Esaki ta resorta bou e cartera di Relacionnan Exterior cu na su turno ta resorta bou e Ministerio di Asunto General.

Aruba su populacion ta consisti di personanan di diferente nacionalidad cu a bin Aruba y contribui na nos desaroyo economico. Recientemente Minister di Labor, Integracion y Energia Glenbert Croes a yega na un acuerdo cu e Cuerpo Consular, e asina yama Protocol di Cooperacion cu lo ta un solucion eficiente pa locual ta trata e otorgamento di permiso. A traves di cada Consulado, lo brinda un plataforma di apoyo, y guia na tur esnan cu kier bin haci un bida na Aruba. Lo duna asistencia na esnan cu kier regla nan estado legal na Aruba, esnan cu kier pidi un extension di nan permiso of saca nan permiso. E protocol aki lo sigura cu e proceso lo sosode via un canal legitimo, cu asistencia di DPL of DIMAS door di e propio consuladonan. 

A bin cu e acuerdo aki pa elimina posibel abuso di tramitadonan cu sa estafa esnan cu ta pidi permiso, cobrandonan sumanan astronomico y na final no ta cumpli of debolbe e suma paga. 

Prome Minister a indica cu un consul ta un funcionario halto y reconoci pa e tratado di Vienna cu ta reconoce e privilegionan, derechonan y autoridad di un consul. Na Aruba e consulnan ta gosa di tur e privilegionan aki y ta eherce nan trabou libremente representando e ciudadanonan di nan pais. 

Prome Minister ta tene reunion cu e consulnan cada tres luna trata tur tema cu ta di nan preocupacion y di e ciudadanonan di e pais cu nan ta representa.