Ta conoci cu e sangura Aedes Aegypti cu ta transmiti e.o Dengue ta mas activo den oranan di mainta trempan y atardi pa anochi y no ta gusta mucho claridad. P’esey por haya e sangura aki den espacionan scur manera den cashi of bou mesa of stoel etc. Durante dia, e sangura aki no ta pica cu mesun frecuencia a no ser cu bo bay unda nan ta scondi, of si bo camber ta scur. E sangura macho den mayoria caso ta alimenta su mes di nectar di mata of fruta, mientras e sangura muhe ta pica hende pa e por alimenta su mes cu sanger pa e por pone webo.

Sabiendo esaki cada ciudadano por tuma e accion necesario pa proteha nan mes contra e sangura aki.

• Bista paña cu man y pia largo durante oranan di atardi pa anochi;
• Durante dia, inspecciona areanan scur pa sangura;
• Uza repelente contra sangura riba cuero cu no ta cubri cu paña;
• Pafo di cas cende mecha of uza bela contra sangura;
• Cera porta y bentana di cas prome cu bira scur of uza screen na porta y ventana;
• Evita di bishita areanan unda bo ta consciente cu tin hopi sangura;
• Spuit paden di cas, camber, oficina y areanan cu bo ta frecuenta cu producto pa mata sangura;
• Pone baby y mucha chikito drumi bao mosketero.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw