IDEA a organisa e proyecto aki den colaboracion cu Bureau Traimerdia y a tuma luga na shete traimerdia, na unda muchanan di klas 5 y 6, cu a participa, a ricibi un certificado. Total a entrega 179 certificado y un regalito na cada mucha cu a participa.

E shete traimerdia cu a participa na e proyecto tabata: Traimerdia San Nicolas, Traimerdia Ayo, Traimerdia Morgenster, Traimerdia Oranjestad, Traimerdia Sabana Basora, Traimerdia Kudawecha y Traimerdia Noord.

‘Kidpreneur$ with BIG Ideas’ ta un proyecto specialmente pa muchanan di klas 5 y 6 cu ta bishita un di e 7 traimerdia di Bureau Traimerdia.

Ta educa y inspira e muchanan durante e proyecto pa medio di e tema ‘entrepreneurship’. A guia e muchanan pa desaroya nan creatividad innovativo den nan propio negoshi. Asina nan a haya un idea con pa bira un comerciante den futuro.

E muchanan a haya varios workshop:

• Skirbi nan propio plan di negoshi; personal di unidad ‘Sustainable Development Planning’ (SDP), a presenta e 17 metanan pa un bon desaroyo sostenibel pa Aruba;
• sra. Jenniffer Guzman, di Bold Real Estate, a presenta e tema ‘Investment’, profesionalmente riba un nivel di mucha. Muchanan a wak nan mes den spiel, y a siña pa kere den nan mes;
• sr. Ludwig Rasmijn di Santa Rosa a siña e muchanan con pa transplanta un mata herbal pa otro pochi y tambe con pa cuide. Por a nota felicidad di e muchanan ora cu nan tabata traha cu e tera pa nan a planta nan mesun mata;
• Departamento di Cultura (DCA) a duna presentacion di cultura manera di musica y mercadeo;
• sra. Estella Thode, a presenta arte/ obra di man. E muchanan a disfruta hopi door di traha nan propio arte, manera pennenhouder y angel di pasco;
• Sra. Clarina Geerman, a siña e muchanan traha un spaarpot;
• Futura a presenta con e futuro negoshi lo mustra y laga e muchanan contesta algun pregunta, via tablet y Kahoot.

E muchanan lo haya oportunidad pa bende nan producto cu nan lo sigui traha, durante un kidbazaar organisa fin di aña den caya grandi.

IDEA kier a gradici cada un di e facilitadonan/ profesionalnan cu a duna nan tempo y pasion pa educa y inspira e muchanan aki, cu ta nos futuro. Un danki na Bureau Traimerdia cu a brinda e oportunidad pa e proyecto aki.