Un di e virusnan cu sangura por transmiti ta Dengue. Dengue ta ocasiona pa un virus transmiti di hende pa hende door di e sangura Aedes Aegypti (sangura pata blanco). Na momento cu e sangura aki pica un persona infecta cu Dengue, e sangura ta keda infecta y ta sigui pasa e virus di un hende pa otro cada bes cu e pica.

For di momento di contagio pa un sangura cu tin e virus te na momento cu e prome sintoma presenta, por dura entre 4-10 dia.

Sintoma di Dengue ta entre otro:

• Keintura halto di alrededor di 40°C;
• dolor di cabes;
• biramento di stoma y sacamento;
• dolor di weso, joints y musculo;
• dolor di wowo;
• rash riba curpa.

Mayoria persona ta recupera di Dengue dentro di 7 dia. Den algun caso e sintomanan por empeora ocasionando Dengue hemoragico cu por ta mortal. E porcentahe general di mortalidad di Dengue ta 1%. Den caso di Dengue grave, mortalidad ta entre 2%-5% si ricibi cuido y tratamento na tempo y den caso di no ricibi tratamento medico,  mortalidad ta alrededor di 20%.

Aedes Aegypti
E sangura Aedes Aegypti cu ta transmiti virus di entre otro Dengue ta midi entre 4-7 mm di largo, ta color scur y ta caracterisa pa su pianan cu strepi blanco. Compara cu otro tipo di sangura, Aedes Aegyti ta e sangura cu tin e habilidad pa transmiti no solamente Dengue pero tambe e virus di Zika, Chikungunya y Gelekoorts.

Ta haya e tipo di sangura aki den region tropical manera, e.o e paisnan di Latino America, Caribe y Aruba. E sangura ta alimenta su mes door di sanger y pa haya esaki e ta pica hende y bestia.

E sangura Aedes Aegypti tin mester di awa para keto pa e por pone webo y broei. Sangura en general ta pone webo den awa limpi cu ta para. Na rand di e awa e sangura ta pone su webonan cu den curso di algun dia nan ta transforma den larva, despues den pupa y den sangura. E ciclo aki for di webo te cu un sangura adulto ta dura entre 5-10 dia. Ta p'esey ta importante, awo cu temporada di yobida ta den porta, pa controla den cura pa obhetonan cu por retene awa di yobida cu por bira sitio di broei pa sangura.

Pa mas informacion like nos Facebook page Directie Volksgezondheid DVG Aruba,
Follow nos riba Instagram directie_volksgezondheid_aruba, subi nos website
www.dvg.aw, yama nos na 5224200 of mail nos na servicio@dvg.aw.