Esaki ta un logro significativo y ta fortalece e laso turistico y economico entre e dos paisnan.

Carlos Barbosa di A.T.A. Brasil a elabora riba e impacto positivo di vuelonan directo, e importancia di e ruta nobo aki, y e relacion di termino largo entre Brasil y Aruba. Brasil ta un di e mercadonan primario na
Latino America pa Aruba, cu expectativa pa crece cu 40% na 2025, compara cu 2024.
Ronella Croes CEO di A.T.A. a enfoca riba e strategia pa atrae bishitantenan di “High Value”, importancia di diversificacion den e contexto aki y cu esey e crecemento di e mercado Brasilero cu a conoce un aumento promedio anual di 14.7% entre 2011 cu 2023. Ademas e Brasilero ta un di e mercadonan cu ta gasta mas na Aruba durante di nan vacacion y esaki entre otro ta haci di Brasil un mercado clave. E mercado aki ta percura pa un estadia promedio di 6,3 anochi y segun estudio di VISA di 2023, e bishitante Brasilero ta conta cu un patronchi di gasto di 843 dolar pa dia. Cual ta nifica cu Brazil ta bira e segundo mercado cu mas ta gasta na Aruba.

Pa Aeropuerto Internacional Reina Beatrix, ta importante pa tin socionan grandi den aviacion manera
GOL. Un aerolinea cu hopi presencia den un mercado grandi di Brasil, y cu potencial grandi pa Aruba. 
Jo-Anne Meaux-Arends, Aviation Business Development Executive di AAA a expresa cu orguyo cu a logra sigura e ruta directo di São Paulo Brasil pa Aruba, cual lo beneficia tanto e local como e bishitante.

A.T.A.  tin como meta pa haci Aruba e destinacion preferi pa e bishitantenan Brasilero. Cu e vuelo non-stop di Brasil pa Aruba, A.T.A. ta consolida e posicion aki, segun Jordan Schlipken Croes, Area
Director di A.T.A. Latino America.

Cu aumento di inversion den mercadeo, accion instrumental cu GOL y cu esnan cu ta bende Aruba den e mercado, combina cu e bishita, reunionnan y eventonan clave, Aruba ta reitera su compromiso y ta sigui crea “momentum” den e mercado.