Esaki ta danki na esfuerso continuo di Cuerpo Policial y otro stakeholders cu tin e tarea pa garantisa siguridad pa un y tur.

Pa mantene e clasificacion como destinacion sigur, Ministerio di Husticia ta keda inverti y recientemente Cuerpo Policial a haci apertura di e ‘Operation Command Center’, cu ta conta cu e ekipo mas moderno den nos region. E centro aki lo fungi como Central di Polis y mes momento lo vigila e radarnan rond di nos isla. Cu e centro moderno aki, KPA por vigila e 258 camaranan cu ta localisa na area di High Rise Hotel, Centro di San Nicolas y 40 otro localidad strategico rond si nos isla, di forma "real time".

E proyecto di camera den areanan publico ta duna husticia un herment importante pa por resolve casonan di manera eficiente y eficaz. E ta facilita e tareanan di polis riba caya y fungi como un wowo extra cu por yuda intercepta esnan cu menos bon intencion of duna un bista di kico a pasa. Esaki lo yuda no solamente combati criminalidad mas eficiente, pero preveni criminalidad door di por actua mas lihe.

Aruba ta den recuperacion y siguridad di nos ciudadanonan semper lo keda prioridad di Gobierno. Cada inversion cu haci den siguridad na Aruba, ta contribui na un Aruba sigur pa un y tur.