E aña aki, ILO a conta cu participacion di 187 pais y mas di 5000 representante di diferente gobierno, gremio sindical, comercial, y otro NGO's.

Aruba tin hopi aña caba ta participa na e conferencia aki, y e aña aki un biaha mas a participa den un delegacion tripartidista di Aruba consistiendo di Gobierno, Representantenan Sindical y Comercial. E delegacion di Aruba a atende e tema di con pa salvaguardia e derechonan fundamental di e trahado: trabao decente, salario decente, y carera decente pa e trahado den cuadro di economia di cuido, cu ta cuido di mucha y di nos grandinan.

Durante e conferencia aki, Aruba y Sint Maarten hunto a representa Reino Hulandes. Un di e metanan di ILO ta pa trece tur hende hunto, no solamente gobiernonan sino gremionan sindical y comercial pa hunto discuti temanan cu ta importante pa e paisnan. Tur aña a bin ta discuti e temanan cu ta di importancia pa e trahado, ta crea un consciencia nacional di guia con pa sigui cana riba e diferente temanan cu e aña aki a bin riba mesa.

Na Aruba tambe tin diferente comision den Departamento di Labor cu ta traha di un forma tripartidista. Gobierno pronto lo inicia cu Dialogo Tripartidista Social Laboral, cu ta inspira a base di e principio tripartidista di ILO. Segun Minister Croes, mester defini e structura tripartidista cu mester ta e structura permanente di consulta di dialogo y decisionnan conhunto.