Armstrong International LLC cla pa cuminsa inmediatamente cu exploracion di gas y crudo

ORANJESTAD - Recientemente a tuma luga e firmamento di e contrato entre Compania Arubano di Petroleo (CAP) cu Andicuri Oil & Gas Exploration VBA (AOGX), cu ta un subsidiario local di Armstrong International LLC (“AI”), pa e exploracion, desaroyo y produccion di hidrocarburos den e area maritimo di Aruba.

Armstrong Oil & Gas ta hopi activo na Merca pero specialmente na Alaska, na unda cu den e ultimo añanan tabata hopi exitoso den haya crudo. E compania tin aproximadamente 2 aña ta purbando na haya un luga perfecto pa busca crudo. Nan a haci investigacion na Aruba y na varios otro luga na Latino America, y basa riba e resultadonan, Aruba ta duna nan mas indicacion di por haya gas y eventualmente crudo.

E firmamento recien ta hopi importante, pa por cuminsa traha cu Aruba den exploracion di gas y crudo. E prome paso ta e trabounan geofisico y geologico, cu speransa cu den e proximo 18 lunanan, nan por a identifica multiple sitio pa bora.

Te ainda ta solamente 4 area (pos) a yega di bora den awanan teritorial di Aruba pa busca crudo, sin mucho exito. Segun Bill Armstrong, CEO di Armstrong International LLC, berdad e compania Repsol haci algun intento y no a haya nada, pero e areanan identifica pa Armstrong ta mustra di ta mas prometedor. 
 

Compania Arubano di Petroleo a firma contrato cu Andicuri Oil & Gas Exploration VBA.