E idea pa e toolkit digital a nace na juli 2021, na momento cu pa medio di e Sociaal Crisis Plan a haci e peticion hunto cu UNICEF HULANDA, y a aplica y ricibi fondo di Union Europeo y Nationale Post Lotterij, pa crea material relevante, sostenibel y duradero pa e profesionalnan na Aruba.

E toolkit digital di Codigo di Proteccion ta un muestra di colaboracion y cooperacion entre e sector di husticia, social, salubridad y enseñansa, cu ta traha preventivamente riba e topico delicado di abuso di mucha. E toolkit ta e prome paso concreto di e centro di experticio di Departamento di Mucha y Hoben, caminda ta structura un forma di traha pa keda “up to date” cu e conocemento riba e tema di abuso di mucha.

Di e forma aki ta percura pa e conocemento y e habilidad di e profesionalnan sigui expande pa traha cu e cinco pasonan di Codigo di Proteccion. Banda di esaki, e supervisornan di codigo por uza esaki durante training, curso of reunion den nan organisacion.

E topico di abuso di mucha ta uno hopi delicado, y mester haya su debido atencion. A tuma y implementa diferente iniciativa, manera e Codigo di Proteccion. Tambe adapta y haci mas estricto e “richtlijnen” di Ministerio Publico pa casonan di abuso sexual y ta trahando riba ubicacion di Family Justice Center. Ademas ta pa prome bes cu Aruba tin un medico forensico. A haci cierto cambio den ley y percura pa diferente curso pa nos profesionalnan.

E solucionnan ta hayando forma y ta tempo pa actua debidamente. Comunidad ta hunga un rol importante den esaki y p’esey ta importante pa keda innova den loke nos ta haciendo diariamente. Cu e introduccion di e toolkit, nos ta duna contenido na e palabra innovacion.

E paso aki ta importante, mirando cu e trabao cu henter e cadena hudicial, social, salubridad y enseñansa ta eherce, ta “mensenwerk”. Na final di dia, por introduci cambio di maneho, cambio di ley, pero bo mester inverti den e profesionalnan cu ta haci e trabao.

Minister ta gradici e "content group" cu a inverti hopi ora di trabou pa por yega na e contenido completamente contextualisa y actual. E ekipo aki conhuntamente cu sosten y guia tecnico di Augeo Foundation: Andrea y Roely y Stan van Haaren di UNICEF NL, a logra crea un producto educativo, informativo y relevante pa tur Supervisor di Codigo, Trainer di Codigo y e profesionalnan na Aruba den e sectornan di enseñansa, social, husticia y salubridad.