Minister Dangui Oduber a reuni cu e representantenan di ATA, Departamento di Impuesto, AHATA, Banco Central, Aruba Rentals Professionals Aruba (VRPA) y DIP.
Ultimamente e topico di vacation rentals ta den discusion, y tin e atencion di Ministerio di Turismo y Salud Publico cu ta esun encarga pa trece e cambionan necesario.

Durante e reunion a instala e "Steering Committee Taskforce for other accommodations", forma pa diferente stakeholders y cu mester traha un rapport cu datonan concreto pa asina gobierno por formula un maneho pa "other accommodations". Ta importante pa tin un bista completo di tur "other accommodations" cu tin na Aruba. E idea ta pa yega na un maneho cu ta practico pa un y tur.

Gobierno no tin un bista di e mercado di "other accommodations" y a instrui e Taskforce pa inventarisa tur vacation rentals. Un compania local cu experticio riba e materia lo haci un gran parti di e tarea aki.

Ta hopi importante pa bin cu regulacion pa propietarionan di "other accommodations" pa por crea un level playing field y tin e cumplimento necesario, pero tambe mantene e calidad di e producto Aruba. 

Gobierno kier regula esaki a base di otorgamento di un permiso cu tur e propietarionan di "other accommodations" mester tin pa por opera un vacation rental.

Segun Minister Oduber, ya caba ta den proceso pa privatisacion di e unidad di Dienst Warenkeuring en Hygiene di DVG y tambe digitalisa henter e proceso di permiso pa horeca. E idea ta pa e unidad aki bira un sui generis y encarga su mes cu henter e proceso di otorgamento di permiso y e controlnan necesario pa mantene e calidad di nos producto Aruba. Esaki ta un proyecto cu ta cana hunto cu esun di “Digitalisering Horeca Vergunning”