Ta asina cu pa un vehiculo di motor cu no ta den uzo y cu no lo bay ta den uzo pa un tempo, no lo tin mester di paga e impuesto di un of mas kwartaal durante aña. 

Esaki ta dispensacion di impuesto y ta valido solamente si cumpli cu e siguiente condicionnan:

• Ta entrega e plachinan di number no mas laat cu dia 1 di juli 2024 
• E plachinan di number ta keda aden pa por lo menos un kwartaal durante aña.  

Por entrega e plachinan di number sea na oficina principal na Camacuri  of na un MFA cerca un cahero(a) pa yena y firma e formulario ‘Inleveren nummer- en controleplaat motorrijtuig’.  Pa medio di e formulario ta declara cu ta entrega e plachinan y ta duna e motibo por ehempel: pa motibo di biahe largo, vehiculo ta daña etc

Mirando cu 1 di juli 2024 ta ultimo dia pa haci pago di impuesto di vehiculo di motor, riba 28 di juni y 1 di juli no ta posibel pa entrega e plachinan na oficina principal of oficina na MFA. Riba e fechanan aki mester acudi na e edificio anexo na Camacuri (oficina unda ta busca plachi di number), pa entrega esakinan.  

E dispensacion di impuesto ta depende di con largo un cliente ta laga su plachinan di number aden. Solamente si e plachinan a keda aden pa un kwartaal completo of pa un termino mas largo, e ora e no mester paga e impuesto di e kwartaal concerni. Por ehempel: si e vehiculo ta daña pa un luna so y e doño a busca e plachinan di number bek, e ora toch e mester paga e impuesto. E dispensacion no ta conta pa cada luna cu e plachi keda aden, sino pa cada kwartaal di aña. 

No tin dispensacion cu forsa retroactivo 
No ta duna dispensacion di impuesto cu forsa retroactivo pa motibo cu mester paga e impuesto delanta.